काठमाडौं । काठमाडौंको नयाँ बानेश्वर चोकमा बन्दै गरेको आकाशे पुल दशैँअघि नै सम्पन्न हुने भएको छ । सडक डिभिजन, काठमाडौंका अनुसार बानेश्वरस्थित आकाशे पुलको निर्माण पूरा हुन १० प्रतिशत मात्र काम बाँकी रहेको छ ।
डिभिजनका सूचना अधिकारी चितरन्जन कुमार रानले आकाशे पुलको भर्याङमा रेलिङ हाल्ने र पाता राख्ने काम बाँकी रहेको बताए । उनले उक्त सामग्री जडान गर्ने काम सुरु भएपछि मानिसहरु सो पुलबाट आवतजावत गर्नका लागि खुल्ला गरिने बताए ।
‘अब धेरै काम बाँकी छैन, भररयाङमा रेलिङ हाल्ने र पाता राख्ने काम बाँकी हो, त्यो राखेपछि मान्छे हिँड्नका लागि खुला गरिन्छ,’ रानले चाणक्य पोष्टसँग भने ‘सक्दो यही दशैँ अघि निर्माण सम्पन्न गरी खुलाउने लक्ष्य रहेको छ ।’
सो पुलका लागि ३ करोड ५२ लाख रुपैयाँ बजेट छुट्याइएको थियो । सो बजेट मध्ये हालसम्म ३० प्रतिशत मात्र रकम भुक्तानी भएको उनले जानकारी दिए । उनका अनुसार हालसम्म ठेकेदारलाई पिल्लरको ढलान रकम मात्र भुक्तानी गरिएको छ । बाँकी रकम पुलको पूरै निर्माण पछि भुक्तानी गरिने उनले बताए ।
बानेश्वर र कोटेश्वरको आकाशे पुल आर्थिक वर्ष २०७६/७७ मा सम्पन्न गर्ने लक्ष्य सहित सुरु गरिएको थियो । बानेश्वरको आकाशे पुल ०७६ वैशाखबाट निर्माण गर्न सुरु गरिएको थियो । ९ महिना भित्र सम्पन्न गर्ने लक्ष्य सहित सुरु गरिएको यस आकाशे पुलका लागि सो पुल ३ करोड ५२ लाख रुपैयाँ बजेट छुट्याइएको थियो ।
विभागले कोभिडका कारण निर्माणमा ढिलाइ हुन गएको जनाएको छ । प्राकृतिक एन्ड पवन जेभी कम्पनीले उक्त बानेश्वर तथा कोटेश्वरमा आकाशे पुल निर्माण ठेक्का लिएको छ । ९ महिना भित्र उक्त आकाशे पुल निर्माण भइसक्नुपर्ने सम्झौता भए पनि विभिन्न अवरोधहरुका कारण निर्माणमा ढिलाइ हुँदै आएको छ ।
कोटेश्वरको आकाशे पुल नबन्ने
कोटेश्वरमा बनाइने आकाशे पुलको विवाद भने अझै सुल्झिन सकेको छैन । आकाशे पुल निर्माणका क्रममा एयरपोर्ट जग्गा समेत मिचेर हवाइ जहाज आउने क्रममा आकाशे पुलले समस्या दिने भएपछि सो पुल निर्माणको टुंगो नलागेको हो ।
कोटेश्वरमा बन्ने भनिएको आकाशे पुल नबन्ने निश्चित भएको डिभिजन कार्यालयका सूचना अधिकारी रानले बताए । एक साथ सुरु गर्ने भनिएको यस आकाशे पुल स्थान नपाए पछि रोकिएको हो ।
‘त्यहाँका वस्ती भएका मानिसहरुले पुल बनाउन ठाउँ दिएका छैनन्, अर्कोतर्फ यरपोर्टको जमिन भएकाले छुट्टै समस्या देखापर्ने भयो, यो बन्ने निश्चत छैन,’रानले चाणक्य पोष्टसँग भने ।
कोटेश्वरमा आकाशे पुल बनाउदा जहाज ल्याण्डीङमा समस्या ल्याउन सक्ने देखिएको विभागले जनाएको छ । कोटेश्वरमा निर्माण हुने आकाशे पुलको लागि २ करोड ९० लाख रुपैयाँ खर्च छुट्याइएको थियो ।