काठमाडौं । काठमाडौं महानगरपालिकाले ०७६/०७७ का लागि ७ वटा विषयगत क्षेत्रमा १३ अर्ब २ करोड १२ लाख ३७ हजार बजेट प्रस्ताव गरेको छ । याे बजेट आन्तरिकतर्फ ४ अर्व ९० करोड २१ लाख ५७ हजार रुपैयाँ छ ।
वाह्य श्रोतबाट ५ अर्ब १९ करोड र अन्य श्रोतबाट १ अर्ब ४ करोड ११ लाख रुपैयाँ बजेट आयको अनुमान गरिएको छ । विकास प्रक्रियामा दीगोपना, स्वामित्व र जनसहभागिता अभिवृद्धि गर्न विकेन्द्रित विकास प्रारुप बमोजिम वडास्तरीय विकास योजना वडा कार्यालयमार्फत सञ्चालन गर्न वडाहरुलाई विभिन्न मापदण्ड तय गरि वडाहरुलाई बजेट दिइएको छ ।
जनसंख्या, क्षेत्रफल, कर परिचालन र विकासको अवस्थाको आधारमा वर्गीकरण गरी ठूला वडाहरुलाई ३ करोड रुपैयाँ, मझौला वडाहरुलाई २ करोड रुपैयाँ र साना वडाहरुलाई १ करोड ५० लाख रुपैयाँ विकास अनुदान उपलब्ध गराएको छ ।
महानगरपालिकाको नगर–नगर साझेदारी कार्यक्रम अन्तर्गत पार्क, हरियाली र सम्पदा प्रवद्र्धन सम्बन्धी परियोजना सञ्चालन गर्न पहिलो चरणमा काठमाडौं जिल्लाका १० वटै नगरपालिकाहरुलाई १ करोडका दरले सम्झौता गरी साझेदारी कार्यक्रम संचालन गरिएको छ ।
