काठमाडौं । नेपाल राष्ट्र बैंकले आगामी मंगलबार (कात्तिक २६ गते) २ अर्ब १० करोड रुपैयाँ बराबरको ट्रेजरी बिल जारी गर्ने भएको छ ।
राष्ट्र बैंकले दुई फरक–फरक अवधिको ट्रेजरी बिल जारी गर्न लागेको हो । बैंकले ९१ दिनको १० करोड र १८२ दिनको २ अर्बबराबरको ट्रेजरी बिल बिक्री गर्न लागेको हो ।
सो बिलको बोलकबोल भने सोमबार (कात्तिक २५ गते) हुनेछ । बिल खरिदका लागि सोमबार मध्यान्ह ३ बजेसम्म अनलाइन बिडिङ्ग प्रणालीमार्फत बोलकबोल गर्न सकिनेछ ।बोलकबोलमा बैंक तथा वित्तीय संस्था, संगठित संस्था तथा सर्वसाधारण नागरिक समेत सहभागित हुन सक्नेछन् ।
९१ दिनको बिल २०७६ माघ २८ गते परिपक्व हुनेछ भने १८२ दिने बिल २०७७ बैशाख ३० गते परिपक्व हुने केन्द्रिय बैंकले बताएको छ ।
यस अघि कात्तिक १८ गते केन्द्रिय बैंकले १ अर्ब ६६ करोड रुपैयाँ बराबरको ट्रेजरी बिल बिक्री गरेको थियो ।
