काठमाडौं । असोज महिनाका लागि ९ वटा वाणिज्य बैंकहरूले मुद्दती निक्षेपको ब्याजदर घटाएका छन् । त्यस्तै, नेपाल बैंकले बढाएको छ भने १० वटाले भदौकै ब्याजदर स्थिर राखेका छन् ।
गत आर्थिक वर्षको कात्तिकदेखि लगातार महिनैपिच्छे निक्षेपको ब्याजदर घटाउँदै आएका बैंकहरूले असोजमा पनि थप घटाएका हुन् । बैंकिङ प्रणालीमा अधिक लगानी योग्य रकम (तरलता) थुप्रिए पनि कर्जाको माग नबढेपछि बैंकहरूले थप ब्याजदर घटाएका हुन् ।
बैंकिङ प्रणालीमा अहिले झण्डै ७ खर्ब रुपैयाँ तरलता छ । तर, कर्जा लगानी हुन नसकेपछि बैंकहरूले स्थायी निक्षेप सुविधा प्रयोग गर्दै ३ प्रतिशत ब्याजदरमा राष्ट्र बैंकमा राखिरहेका छन् । साथै, राष्ट्र बैंकले पनि निक्षेप बोलकबोल मार्फत हप्तैपिच्छे अर्बौं रुपैयाँ खिच्दै आएको छ ।
महँगो ब्याजमा उठाएको निक्षेप राष्ट्र बैंकमा ३ प्रतिशतमै राख्नुपर्ने बाध्यता आएपछि बैंकहरूले आफ्नो लागत घटाउन पनि निक्षेपको ब्याजदर घटाएका हुन् ।
भदौको तुलनामा असोजमा वाणिज्य बैंकहरूले औसतमा व्यक्तिगत निक्षेपतर्फ ०.१३ प्रतिशत बिन्दु र संस्थागततर्फ ०.०६ प्रतिशत बिन्दुले घटाएका छन् । भदौमा व्यक्तिगत मुद्दतीको औसत ब्याजदर ६.५३ प्रतिशत रहेकोमा असोजमा घटेर ६.४० प्रतिशतमा झरेको छ । त्यस्तै, संस्थागत मुद्दतीको औसत ब्याजदर भदौमा ५.२५ प्रतिशत रहेकोमा असोजमा घटेर ५.२० प्रतिशतमा झरेको छ ।
असोजका लागि ९ वाणिज्य बैंकले निक्षेपको ब्याजदर घटाएका छन् । जसमा एनएमबी बैंकले सबैभन्दा धेरै व्यक्तिगततर्फ १ प्रतिशत बिन्दु र संस्थागततर्फ ०.९१ प्रतिशत बिन्दुले घटाएको छ । त्यस्तै, कुमारी ०.७ प्रतितश बिन्दु, प्राइम कमर्शियलले ०.५ प्रतिशत बिन्दुले घटाएका छन् ।
त्यस्तै, सानिमा, नेपाल एसबीआइ, नबिल, एनआइसी एशिया, एभरेष्ट र राष्ट्रिय वाणिज्य बैंकले पनि निक्षेपको ब्याजदर घटाएका छन् ।
असोजमा नेपाल बैंकले व्यक्तिगत तर्फ ०.७० प्रतिशत र संस्थागततर्फ ०.९५ प्रतिशत बिन्दुले ब्याजदर बढाएको छ ।
असोजमा कृषि विकास, हिमालयन, माछापुच्छ्रे, स्ट्याण्डर्ड चार्टर्ड, नेपाल इन्भेष्टमेन्ट मेगा, सिद्धार्थ, सिटिजन्स, लक्ष्मी सनराइज र ग्लोबल आइएमईले भने भदौकै ब्याजदरलाई निरन्तरता दिएका छन् ।
असोजमा वाणिज्य बैंकहरू बीच निक्षेपको ब्याजदर १.२८ प्रतिशत बिन्दुसम्म फरक भएको छ । एनआइसीले सर्वाधिक ७.१८ प्रतिशत ब्याजदर दिने भएका छन् भने सानिमाले सबैभन्दा कम ५.९ प्रतिशत ब्याज दिने भएको छ । वाणिज्य बैंकहरूले ब्याजदर घटाएको यो लगातार बाह्रौं महिना हो ।
बैंकिङ प्रणालीमा अधिक तरलता हुँदाहुँदै पनि २०८० असोजमा बैंकहरूले अर्को बैंकमा रहेको निक्षेप खोस्न ब्याजदर बढाएका थिए । तर, महँगो ब्याजमा उठाएको निक्षेप कर्जा लगानी गर्न नसकेपछि बैंकको उल्टो लागत बढेको थियो । अर्थतन्त्रमा आएको संकुचनका कारण कर्जाको माग बढ्न नसकेपछि बैंकहरूले बाध्य भएर ब्याजदर घटाउन थालेका हुन् ।
२०८० साउनदेखि नेपाल बैंकर्स संघले ब्याजदरमा रहेको भद्र सहमती तोडेको थियो । त्यस यता बैंकहरूलाई आफूखुसी स्वतन्त्र रुपमा निक्षेपको ब्याजदर तोक्दै आएका छन् । साउनअघि संघले ब्यादरमा हस्तक्षेप गर्दा सबै बैंकको एउटै ब्याजदर हुने गरेको थियो ।
