काठमाडौं । चन्द्रगिरि हिल्स प्रालिको खुद नाफामा उल्लेख्य सुधार आएको छ । कम्पनीले बिहीबार सार्वजनिक गरेको गतआर्थिक वर्ष २०८०/८१ को चौथो त्रैमासको अपरिष्कृत वित्तीय विवरण अनुसार खुद नाफा ९९.३९ प्रतिशतले बढेको छ ।
गत असार मसान्तसम्म कम्पनीले २२ करोड ३८ लाख रुपैयाँ खुद नाफा कमाएको छ । यो अघिल्लो आव २०७९/८० को तुलनामा ११ करोड रुपैयाँ धेरै हो । अघिल्लो आवमा कम्पनीले ११ करोड २० लाख रुपैयाँ नाफा कमाएको थियो ।
पछिल्लो समय पर्यटकीय गतिविधिमा उल्लेख्य सुधार आएसँगै कम्पनीको आम्दानी बढ्दा नाफा बढेको हो । स्वदेशी तथा विदेशी पर्यटकको आवगमन बढ्दा कम्पनीको व्यवसायमा आर्कषक सुधार आएको छ ।
समीक्षा अवधिमा कम्पनीको संचालन आम्दानी ९.४९ प्रतिशतले बढेर १ अर्ब रुपैयाँ पुगेको छ । यस्तै, कम्पनीको अन्य आम्दानी भने २८.०२ प्रतिशतले घटेर १ करोड १ लाखमा सीमित भएको छ ।
समीक्षा अवधिमा कम्पनीको कुल खर्च २९.३७ प्रतिशतले बढेर ३० करोड ७७ लाख रुपैयाँ पुगेको छ ।
हाल १ अर्ब ५३ करोड रुपैयाँ चुक्ता पूँजी रहेको कम्पनीको जगेडा कोष भने ७ करोड ६ लाख रुपैयाँ ऋणात्मक छ ।
नाफा बढेसँगै कम्पनीको प्रतिसेयर आम्दानी पनि दोब्बरले बढेको छ । समीक्षा अवधिमा कम्पनीको प्रतिसेयर आम्दानी ७.३० रुपैयाँबाट बढेर १४.५६ रुपैयाँ पुगेको छ ।
समीक्षा अवधिमा कम्पनीको प्रतिसेयर नेटवर्थ ९५.३९ रुपैयाँ छ ।
