काठमाडौं । कामना सेवा विकास बैंकले अविमोच्य असंचित अग्राधिकार सेयर (सेयर रकम फिर्ता नहुने) जारी गर्ने भएको छ ।
असार १७ गते बसेको बैंक संचालक समितिको बैठकले प्रतिकित्ता १०० रुपैयाँ दरले ३५ करोड रुपैयाँ बराबरको ३५ लाख कित्ता अग्राधिकार सेयर जारी गर्ने निर्णय गरेको हो ।
उक्त सेयर बैंकले व्यक्तिगत तवरबाट संस्थागत लगानीकर्तालाई मात्र बिक्री गर्ने जनाएको छ ।
बैंकका अनुसार उक्त अग्राधिकार सेयरमा लगानी गर्नेले वार्षिक ९ प्रतिशत प्रतिफल पाउने छन् । यद्यपि, नाफा कमाएको वर्ष मात्रै लाभांश दिने बैंकले जनाएको छ ।
पूँजीकोषको दबाबमा रहेको बैंकले पूँजी कोष व्यवस्थापनका लागि अग्राधिकार सेयर जारी गर्न लागेको हो । नेपाल राष्ट्र बैंकले हालै पूँजी कोष व्यवस्थापनका लागि अग्राधिकार सेयर जारी गर्न पाउने व्यवस्था गरेको थियो ।
तोकिएको पूँजीकोष कायम गर्न नसके बैंकहरुलाई थप कर्जा विस्तारमा समस्या हुन्छ । साथै, कुनै आर्थिक वर्षको कुनै अवधिमा तोकिएको पूँजीकोष अनुपात कायम गर्न नसके राष्ट्र बैंकले लाभांश वितरणमा रोक लगाउँछ ।
