काठमाडौं । सरकारले भारतबाट ४ प्रकारका मसला आयातमा प्रतिबन्ध लगाएको छ । खाद्य प्रविधि तथा गुण नियन्त्रण विभागले भारतीय दुई ब्रान्डका ४ मसला आयात र बिक्री वितरणमा प्रतिबन्ध लगाएको हो ।
विभागले एमडीएचको मद्रास करी पाउडर, साम्बर मसला मिक्स्ड मसला पाउडर र करी पाउडर मिक्स्ड मसला आयातमा प्रतिबन्ध लगाएको हो ।
त्यस्तै, एभरेस्ट ब्रान्डको फिस करी मसलाको आयात र बिक्रीवितरणमा रोक लगाएको हो । एमडीएचका उक्त मसलाहरू १०० ग्राम र एभरेस्टको ५० ग्रामको प्याकिङ रहेको छ ।
यसअघि विश्व बजारमा हङकङ र सिंगापुरले ती मसलामा हानिकारक ‘एथलिन अक्साइड’ रहेको भन्दै आयातमा रोक लगाएका थिए । विभिन्न अन्तर्राष्ट्रिय सञ्चार माध्यममा आएको समाचारका आधारमा तत्काललाई ४ प्रकारका मसला आयातमा रोक लगाइएको विभागले जनाएको छ ।
यस्तै, विभागले विभागले उल्लिखित ब्रान्डका उत्पादन बजारमा रहेको भए फिर्ता गर्न पनि आयातकर्तालाई निर्देशन दिएको छ ।
