काठमाडौं । सानिमा रिलायन्स लाइफ इन्स्योरेन्सको खुद नाफा झन्डै दोब्बरले बढेको छ । कम्पनीले शुक्रबार सार्वजनिक गरेको चालु आर्थिक वर्ष २०८०/८१ को तेस्रो त्रैमासको वित्तीय विवरण अनुसार गत वर्षको सोही अवधिको तुलनामा खुद नाफा ९२.९४ प्रतिशतले बढेको हो ।
सानिमाले चालु वर्षको चैत मसान्तसम्म ३० करोड ४८ लाख ३१ हजार रुपैयाँ खुद नाफा कमाएको छ । यो गत आव सोही अवधिको तुलनामा १४ करोड ६१ लाख रुपैयाँ बढी हो । कम्पनीले गत वर्ष चैतसम्म १५ करोड ७९ लाख ९४ हजार रुपैयाँ नाफा कमाएको थियो ।
समीक्षा अवधिमा कम्पनीको खुद बीमा शुल्क आर्जन र लगानी तथा कर्जाबाट हुने आम्दानीमा उल्लेख्य सुधार आउँदा खुद नाफा बढेको हो ।
चालु वर्षमा कम्पनीको कुल बीमा शुल्क संकलन ११७.०८ प्रतिशतले बढेर ४ अर्ब १ करोडले बढेर रुपैयाँ पुगेको छ । चैतसम्म कम्पनीको ऋण तथा लगानीबाट हुने आम्दानी १४२.७२ प्रतिशतले बढेर १ अर्ब १२ करोड रुपैयाँ पुगेको छ ।
हाल ४ अर्ब १८ करोड रुपैयाँ चुक्ता पूँजी रहेको इन्स्योरेन्सको रिटेन्ड अर्निङमा ९९ करोड ७२ लाख रुपैयाँ र महाविपत्ती कोषमा १२ करोड ६९ लाख रुपैयाँ संचित छ ।
खुद नाफा बढेसँगै कम्पनीको प्रतिसेयर आम्दानीमा पनि उल्लेख्य सुधार आएको छ । समीक्षा अवधिमा कम्पनीको प्रतिसेयर आम्दानी ५.०३ रुपैयाँबाट बढेर ९.७१ रुपैयाँ पुगेको छ । कम्पनीको प्रतिसेयर नेटवर्थ १२६.९९ रुपैयाँ छ ।
