काठमाडौं । विदेशी मुद्रा संचिति इतिहासमै धेरै भएको छ । नेपाल राष्ट्र बैंकले आइतबार सार्वजनिक गरेको चालु आर्थिक वर्षको ७ महिना (माघसम्म)को तथ्यांक अनुसार विदेशी मुद्रा संचिति १८ खर्ब ४४ अर्ब ९४ करोड रुपैयाँ पुगेको छ ।
गत असारको तुलनामा असोजमा विदेशी मुद्रा संचिति १९.९ प्रतिशतले बढेको हो । असार मसान्त्सम्म कुल विदेशी मुद्रा संचिति १५ खर्ब ३९ अर्ब ३६ करोड रुपैयाँ थियो ।
कुल विदेशी विनिमय सञ्चितिमध्ये नेपाल राष्ट्र बैंकमा १६ खर्ब २३ अर्ब ९२ करोड रुपैयाँ र बैंक तथा वित्तय संस्थासँग २ खर्ब २१ अर्ब २ करोड रुपैयाँ छ ।
आर्थिक वर्ष २०८०/८१ को पहिलो ७ महिनाको आयातलाई आधार मान्दा बैकिङ्ग क्षेत्रसँग रहेको विदेशी विनिमय सञ्चिति १४.७ महिनाको वस्तु आयात र १२.३ महिनाको वस्तु तथा सेवा आयात धान्न पर्याप्त रहने देखिन्छ ।
यस्तै, अमेरिकी डलर संचिति हालसम्मकै धेरै भएको छ । माघसम्म राष्ट्रिय ढुकुटीमा १३ अर्ब ८९ करोड अमेरिकी डलर संचित छ । यो राष्ट्रिय ढुकुटीमा यति धेरै डलर जम्मा भएको इतिहासमै पहिलो पटक हो ।
यसअघि गत महिना १३ अर्ब ६९ करोड डलर संचिति करोड थियो । गत असारको तुलनामा चालु वर्षमा डलर संचिति १८.६ प्रतिशतले बढेको हो ।
रेमिट्यान्स आप्रवाहमा वृद्धि, पर्यटकको आवगमन बढ्नु र विदेशी वस्तुको आयात घट्दा डलर संचिति लगातार बढेको हो । २०७९ असोजदेखि डलर संचितिमा लगातार सुधार आएको छ । पछिल्लो एक महिनामा मात्रै राष्ट्रिय ढुकुटीबाट २० करोड डलर थपिएको ।
डलर संचिति बढेको यो लगातार सोह्रौं महिना हो । राष्ट्रिय ढुकुटीमा चालु आवको साउनमा १२ करोड, भदौमा १६ करोड, असोज ३७, कात्तिकमा ४२ करोड, मंसिरमा ५५ करोड र पुसमा ३९ करोड डलर थपिएको छ ।
त्यस्तै, गत वर्षको असोजमा १३ करोड, कात्तिकमा १५ करोड, मंसिरमा १९ करोड, पुसमा ४८ करोड, माघमा २० करोड, फागुनमा १९ करोड, चैतमा २५ करोड, वैशाखमा २७ करोड, जेठमा ९ करोड र असारमा ४३ करोड डलर थपिएको थियो ।
सरकारले डलर संचिति घटेको भन्दै २०७८ चैतदेखि वर्षदेखि विभिन्न विलासी वस्तुको आयातमा प्रतिबन्ध लगाएको थियो । तर, २०७९ पुसदेखि सरकारले आयात खुलाए पनि त्यसका बाबजूद डलर संचितिमा लगातार सुधार आएको हो ।
