काठमाडौं । लामो समयदेखि तरता अभाव झेलीरहेका बैंकहरुले पर्याप्त मात्रमा निक्षेप संकलन गर्न नसक्दा माग बमोजिम कर्जा प्रवाह गर्न सकिरहेका छैनन् ।
बैंकहरुको निक्षेप संकलन र कर्जा प्रवाहको अवस्थामा असन्तुलन बढ्दै गएको छ । एक महिना आक्रमक कर्जा विस्तार गरे अर्को महिना संकुचित हुनु पर्ने अवस्था रहेको छन् ।
यसले एकातिर बैंकको व्यावसाय विस्तारमा धक्का पुग्नुको साथै नाफामा समेत गिरावट ल्याउँछ भने अर्कोतर्फ सर्वसाधरणले ऋण नपाउने अवस्था आएको छ । जसले समग्र बैंकिङ्ग प्रणालीलाई नै प्रभाव पारेको छ ।
पछिल्लो समय कर्जा विस्तारमा सुस्ताएका बैंकहरु मंसिरको दोस्रोसाता लागेदेखि फेरि आक्रमक रुपमा कर्जा विस्तारमा लागेका छन् । बैंकहरु कर्जा विस्तारमा आक्रमक हुन थालेपछि निक्षेप भने घटेको छ ।
मंसिर महिनाको दोस्रो सातामा बैंकिङ प्रणालीबाट ४ अर्ब निक्षेप घटेको छ । सो अवधमिा बैंकहरुको ७ अर्ब कर्जा प्रवाह गरेका छन् ।
मंसिरको पहिलो साता ९ अर्ब निक्षेप उठाएका बैंकहरुले कर्जा विस्तार ठप्पै पारेका थिए । मंसिर महिनाको दुई सातामा ५ अर्ब निक्षेप थपिँदा ७ अर्ब कर्जा प्रवाह गरेका छन्।
चालू आर्थिक वर्षको मंसिर १३ गते सम्ममा वाणिज्य बैंकहरुमा कूल निक्षेप २९ खर्ब ७९ अर्ब रुपैयाँ पुगेको छ । यस अवधिमा बैंकहरुले कूल २६ खर्ब ४७ अर्ब रुपैयाँ कर्जा प्रवाह गरेका छन ।
बैंकहरुले चालू आर्थिक वर्षमा निक्षेप भन्दा ४८ अर्ब धेरै कर्जा प्रवाह गरेका छन । बैंकहरुले साउनदेखि यता १ खर्ब १ अर्ब रुपैयाँ निक्षेप संकलन गरेर १ खर्ब ४९ अर्ब रुपैयाँ कर्जा प्रवाह गरेका छन् ।
