काठमाडौं । उद्योगीहरूले नेपाल विद्युत् प्राधिकरणले डेडिकेटेड र ट्रंक लाइनको बिजुली प्रयोग गरेको प्रमाण दिए सबै महशुल तिर्ने बताएका छन् ।
नेपाल विद्युत् प्राधिकरणले ६१ वटा उद्योगले बक्यौता नतिरेको भन्दै धमाधम लाइन काट्न थालेपछि व्यवसायीहरूले आइतबार पत्रकार सम्मेलन आयोजना गरी आफ्नो धारण राख्दै यस्तो बताएका हुन् ।
उनीहरूले उद्योगीले नियमित बिजुली महशुल तिरिरहको तर, प्राधिकरणले प्रयोग नै गरेको बिजुलीको बिल पठाएर उद्योगीलाई तनाव दिएको बताएका हुन् ।
नेपाल उद्योग वाणिज्य महासंका पूर्वअध्यक्ष पशुपति मुरारकाले उद्योगीले नियमित बिलको पैसा तिरेको बताए । उनले प्राधिकरणले प्रयोग नै नगरेको बिजुलीको बिल पठाएर उद्योगीलाई तनाव दिइएको बताए ।
‘तिर्नुपर्ने बिलको पैसा नतिरेको भए त्यसको भागीदार बन्छौं । प्रमाण देखाउनुस् हामी पैसा तिर्न तयार छौं,’ उनले भने, ‘अहिले प्रयोग नै नगरेको बिजुलीको बिल पठाएर हामीलाई तनाव दिइएको छ । लाइन काटिएको छ । यसको क्षतिको भागीदार को हुन्छ ?’
नेपाल उद्योग परिसंघका अध्यक्ष राजेश अग्रवालले बिजुली प्रयोग गरेको प्रमाण माग्दा उल्टै लाइन काटेको बताए । ‘एउटा व्यक्तिको महत्वाकाङ्क्षा पूरा गर्नका लागि सरकार नै प्रयोग हुन मिल्छ ? उद्योग गर्नु अपराध हो ?,’ उनले प्रश्न गरे ।
नेपाल उद्योग वाणिज्य महासंघका वरिष्ठ उपाध्यक्ष अन्जन श्रेष्ठले उद्योगीहरू बक्यौता तिर्न तयार रहे पनि कुलमान घिसिङले आफ्नो बोलीनै कानुन ठानेको बताए ।
‘प्रमाण देखाउ पैसा तिर्छौं भन्दा कुलमान घिसिङ अदालतमा देखाउँछु भन्नुहुन्छ,’ उनले भने,’ ‘उहाँले जे बोल्नु भयो त्यो नै कानुन हो ? उद्योगीको टाउको माथि तरबार झुण्डाउने र तर्स्याउने काम भएको उनको भनाइ छ ।
उद्योगी पवन गोल्यानले रिलायन्स स्पिनिङ मिल्सको विद्युत् महसुल बाँकी नराखेको र विद्युत् प्राधिकरणले प्रमाण देखाए बक्यौता भुक्तानी गर्ने बताए । ‘रिलायन्स स्पिनिङ मिल्सको एक सुका पनि तिर्नुपर्ने भए रगत बगाउन तयार छु । प्राधिकरणले हावादारी रूपमा फर्जी बिल पठाएर हुँदैन,’ उनले भने ।
प्राधिकरणले शुक्रबारसम्म बक्यौता नतिरेको भन्दै २३ उद्योगको बिजुली लाइन काटिसकेको छ ।
