काठमाडौं । उच्च अदालत पाटनले यशोदा फुड्सलाई वाइवाइ चाउचाउको ट्रेडमार्क नक्कल गरी करेन्ट चाउचाउ उत्पादन र बिक्री वितरण गर्न रोक लगाएको छ ।
उच्च अदालत पाटनको संयुक्त इजलासले पुस ११ गते यशोदा फुड्सलाई यस्तो कार्य नगर्न अन्तरकालीन आदेश दिएको हो ।
यशोदाद्धारा उत्पादित करेन्ट चाउचाउले वाइवाइको ट्रेडमार्क नक्कल गर्दै वाइवाइ जस्तै देखिने र्यापर प्रयोग गरी उपभोक्तालाई भ्रममा पार्ने काम गरेको थियो । साथै यशोदाले वाइवाइको ट्रेडमार्क नक्कल समेत गरेको थियो । यशोदाको सो कदमविरुद्ध वाइवाइ अदालत गएको थियो ।
अदालतको आदेशसँगै अब यशोदाले वाइवाइको नक्कल गरी बजारमा पठाइएका करेन्ट चाउचाउ यशोदा फुड्सले फिर्ता गर्नुपर्ने भएको छ । यदि बजारमा पठाइएका उक्त चाउचाउ यथावत रुपमा बिक्री वितरण गरिएमा अदालतको मानहानी गरेको ठहरिनेछ ।
अन्तर्राष्ट्रिय गुणस्तर मापदण्ड कायम गरी चौधरी ग्रुपद्वारा उत्पादित वाइवाइ नेपालका साथै विश्वभर छरिएका नेपालीको विगत चार दशकदेखि पहिलो रोजाइमा रहँदै आएको छ ।
