काठमाडौं । अर्थतन्त्रमा दखिएको शिथिलताको असर बीमा व्यवसायमा देखिएको छ । बीमा प्राधिकरणका अनुसार चालु आर्थिक वर्षको पहिलो चैमासिकमा निर्जीवन बीमा व्यवसायमा भारी गिरावट आएको हो ।
चालु आवको कात्तिक मसान्तसम्म निर्जीवन बीमा कम्पनीको बीमा शुल्क संकलन ४.७० प्रतिशतले घटेको छ ।

गत वर्षको सोही अवधिमा १३ अर्ब ३५ करोड रुपैयाँले बीमा व्यवसाय गरेका कम्पनीहरुले यस वर्षको चार महिनामा १२ अर्ब ७३ करोड रुपैयाँ प्रिमियम संकलन गरेका छन् । यो गत वर्षकोभन्दा ६२ करोड ८१ लाख रुपैयाँले न्यून हो । यस अवधिमा निर्जीवन बीमा कम्पनीको बीमालेखमा पनि गिरावट आएको छ ।

कम्पनीहरुले चालु वर्षको कात्तिकसम्म ८ लाख ९४ हजार कुल बीमालेख जारी गरेका छन् । यो गत वर्षको सोही अवधिकोभन्दा २.६८ प्रतिशतले कम हो । गत वर्षको यही अवधिमा कम्पनीहरुले ९ लाख १९ हजार बीमा लेख जारी गरेका थिए ।

गत वर्षदेखि आन्तरिक अर्थतन्त्र चलायमान नहुँदा व्यापार व्यवसाय बढ्न सकेको छैन । जसको कारण समग्र वित्तीय प्रणाली खल्बलिएको छ । उच्च ब्याजदर, आयस्रोतको घट्नु, महंगी बढ्नु जस्ता कारणले उपभोक्ताको खर्च गर्ने क्षमतामा ह्रास आएको छ । सोही कारण बीमा व्यवसायमा समेत धक्का लागेको देखिन्छ ।

१४ वटा निर्जीवन बीमा कम्पनी मध्ये ९ वटाको व्यवसाय वृद्धि भएको छ भने पाँचको घटेको छ । प्राधिकरणका अनुसार सबैभन्दा धेरै प्रभु इन्स्योरेन्स कम्पनीले ४४.३२ प्रतिशतले व्यवसाय विस्तार गरेको छ ।
हिमालयन एभरेष्ट १४ प्रतिशत, ओरिअन्टल १७, नेशनल इन्स्योरेन्स कम्पनीले १५ प्रतिशतले व्यवसाय बढाएका छन् ।

सबैभन्दा धेरै राष्ट्रिय बीमा कम्पनीको व्यवसायमा ५५.३४ प्रतिशतले व्यवसायमा गिरावट आएको छ । सिद्धार्थ प्रिमियरको १८ र युनाइटेड अजोडको १४ प्रतिशतले व्यवसाय घटेको छ ।

यो अवधिमा सबैभन्दा धेरै सलिको इन्स्योरेन्सले १ अर्ब ६० करोड रुपैयाँको बीमा शुल्क संकलन गरेको छ भने न्यून नेशनल इन्स्योरेन्स कम्पनीले ४३ करोड १७ लाख रुपैयाँ बराबरको बीमा शुल्क संकलन गरेको छ ।