काठमाडौं । चालु आर्थिक वर्षमा रेमिट्यान्स आप्रवाहमा उल्लेख्य सुधार भएको छ । नेपाल राष्ट्र बैंकले शुक्रबार सार्वजनिक गरेको चालु आवको तीन महिना (असोज)सम्मको तथ्यांक अनुसार विप्रेषण आप्रवाह ३० प्रतिशतले वृद्धि भएको हो ।
राष्ट्र बैंकका अनुसार चालु वर्षको असोज मसान्तसम्म कुल ३६५ अर्ब ३४ करोड रुपैयाँ रेमिट्यान्स भित्रिएको छ । औसतमा चालु वर्षमा हरेक महिना १ खर्ब रेमिट्यान्स भित्रिएको हो । १ खर्ब २२ अर्ब विप्रेषण नेपाल भित्रिएको छ ।
चालु आवमा वैदेशिक रोजगारीमा जाने कामदारको संख्यामा घटे पनि अघिल्लो वर्षमा ७ लाख बढी विदेशिएकाले रेमिट्यान्स आप्रवाह बढेको हो । साथै, वैधानिक तवरबाटै विप्रेषण भित्रने क्रम पनि बढेकाले आप्रवाहमा सुधार देखिएको हो ।
समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत-नयाँ) लिने नेपालीको संख्या १ लाख १३ हजार ३९७ जना रहेको राष्ट्र बैंकले जनाएको छ । त्यस्तै, पुनः श्रम स्वीकृति लिनेको संख्या ४९ हजार २९७ रहेको छ ।
अघिल्लो वर्षको सोही अवधिमा नयाँ श्रम स्वीकृति लिनेको संख्या १ लाख ४७ हजार ९३२ र पुनः श्रम स्वीकृति लिनेको ५७ हजार ८६१ जना थिए ।
