काठमाडौं । फूडमाण्डुमा अब ५०० रुपैयाँभन्दा कम मूल्यको खाना पनि अर्डर गर्न सकिने भएको छ । कम्पनीले यसअघिको कम्तीमा पनि ५०० रुपैयाँको खाना अर्डर गर्नुपर्ने व्यवस्था हटाएको हो ।
यससँगै अब ग्राहकहरूले जतिसुकै रकमको अर्डर गर्न सक्नेछन् । ग्राहकको सुझावलाई मध्येनजर गर्दै यसअघिको नीति परिवर्तन गरिएको कम्पनीले जनाएको छ ।
यस्तै, कम्पनीले छोटो दूरीमा हुने फूड डेलिभरी शुल्क पनि घटाएको छ । अहिले छोटो दूरीको डेलिभरी चार्ज न्यूनतम ५० रुपैयाँ तिर्दै आएकोमा अब उपभोक्ताले १.५ किलोमिटरसम्मको २५ रुपैयाँ र सोभन्दा माथिको दूरीको प्रतिकिलोमिटर थप २५ रुपैयाँ तिर्नुपर्ने हुन्छ । यद्यपि, १ हजार रुपैयाँभन्दा बढीको अर्डरको लागि भने जतिसुकै लामो दूरीमा पनि बढीमा ७५ रुपैयाँ डेलिभरी शुल्क तोकिएको छ ।
फूडमाण्डूका संस्थापक तथा प्रबन्ध निर्देशक मनोहर अधिकारीले ग्राहकलाई फाइदा हुने गरी कम्पनीको नीति परिवर्तन गरिएको बताए ।
‘रु ५०० को न्यूनतम अर्डर गर्नुपर्ने बाध्यतालाई हामीले सदाको लागि हटाएका छौँ । साथै हामीले हाम्रो डेलिभरी शुल्कमा पनि ग्राहकवर्गलाई फाइदा हुनेगरी केही हेरफेर गरेका छौँ । आजसम्म हामीलाई साथ दिनुहुने र माया गर्नुहुने उपभोक्ताहरुको सुझाव र प्रतिकृयालाई प्राथमिकतामा राख्दै हामीले यो कदम चालेको छौँ । हामीलाई आशा छ कि हाम्रो यो निर्णयले हाम्रा उपभोक्तालाई अझै राम्रो सेवा प्रदान गर्नेछ,’ उनले भने ।
सन् २०१०देखि संचालनमा आएको फूडमाण्डु नेपालको पहिलो फूड डेलिभरी कम्पनी हो । फूडमाण्डुले हालसम्म ४ लाखभन्दा बढी ग्राहकहरुलाई ८ सयभन्दा बढी रेष्टुरेन्टहरुमार्फत काठमाडौं उपत्यका र पोखरामा सेवा प्रदान गर्दै आएको छ ।
