काठमाडौं । नेपाल एयरलाइन्सले भैरहवास्थित गौतमबुद्ध अन्तर्राष्ट्रिय विमानस्थलबाट काठमाडौं ट्रान्जिट बनाएर सुरु गरेको दिल्ली हुँदै हङकङ उडानमा यात्रु नपाउँदा खाली उडेकेा छ ।
निगमले उडान तालिका सार्वजनिक गरेर टिकट बुकिङ खुला गरे पनि यात्रु नपाउँदा खाली उडान गरेको हो । बिजनेश पाए उडान तालिका संख्या थप्ने योजनामा रहेको निगमलाई यो पहिलो उडानले नै धक्का लगाएको छ ।
आन्तरिक व्यवस्थापन कमजोर र तयारी नगरि लहडमा उडान भर्दा पहिलो कनेक्टिङ उडान असफल भएको निगमका एक अधिकारीले बताए । ‘गौतमबुद्ध विमानस्थलबाट विजनेश नपाइने एउटा समस्या त छँदैछ । त्यसमाथि निगम व्यवस्थापनले आन्तरिक तयारी नगरि उडान सुरु गर्दा यस्तो अवस्था आयो’, उनले भने ।
एयरलाइन्सले भाद्र १२ गतेदेखि गौतमबुद्ध अन्तर्राष्ट्रिय विमानस्थलबाट काठमाडौंलाई टान्जिट बनाएर हङकङ र दिल्लीमा नियमित उडान भर्ने तालिका तय गरेको थियो ।
सोही प्रयोजनको लागि एयरलाइन्सले आइतबार टिकट बुकिङ खुला समेत गरेको थियो । निगमले सुरुमा भैरहवाबाट हरेक मंगलबार हप्ताको एक उडान गर्ने र पछि बजारको माग तथा निगमको व्यवस्थापन अनुसार उडानको संख्या थप्ने योजना छ ।
बिहान ८ः१५ मा भैरहवाबाट उडेको जहाज ९ बजे काठमाडौंमा अवतरण गर्ने र ट्रान्जिट बनाएर पछि हङकङ जाने निगमको उडान तालिका छ । जसअनुसार दिल्ली जाने यात्रु समेत सोही कनेक्टिङ उडानमा चढ्ने उडान तालिका थियो ।
