काठमाडौं । लक्ष्मी लघुवित्त वित्तीय संस्था घाटामा गएको छ । लघुवित्तले बुधबार सार्वजनिक गरेको गत आर्थिक वर्ष २०७९/८० को चौथो त्रैमासको अपरिष्कृत वित्तीय विवरण अनुसार ८ करोड ३० लाख रुपैयाँ नोक्सानी व्यहोरेको छ ।
जबकी अघिल्लो वर्ष लघुवित्तले १५ करोड ९० लाख रुपैयाँ नाफा कमाएको थियाे । खुद ब्याज आम्दानी, संचालन नाफा घट्नुका साथै खराब कर्जा उल्लेख्य बढ्दा लघुवित्त घाटामा गएको हो ।
समीक्षा अवधिमा लघुवित्तको खुद ब्याज आम्दानी ३१.३१ प्रतिशत घटेर ३६ करोड ६९ लाख रुपैयाँमा सीमित भएको छ । त्यस्तै, अघिल्लो वर्ष २० करोड ६९ लाख रुपैयाँ संचालन नाफामा रहेको लघुवित्त गत वर्ष ८ करोड ३४ लाख संचालन नोक्सानी व्यहोरेको छ ।
समीक्षा अवधिमा लघुवित्तले ५ अर्ब ३४ करोड निक्षेप तथा सापटी लिई ५ अर्ब ७६ करोड कर्जा लगानी गरेको छ ।
हाल ४४ करोड १६ लाख रुपैयाँ चुक्ता पूँजी रहेको लघुवित्तको रिटेन्ड अर्निङमा १३ करोड ३५ लाख र जगेडा कोषमा २१ करोड ५४ लाख रुपैयाँ सञ्चित छ।
समीक्षा अवधिमा लघुवित्तको वितरणयोग्य मुनाफा ६ करोड ९० लाख रुपैयाँ छ । यसबाट लघुवित्तले सेयरधनीलाई १५.६२ प्रतिशत लाभांश बाँड्न पुग्छ ।
नाफा घटेसँगै लघुवित्तको प्रतिसेयर आम्दानी ऋणात्मक भएको छ । अघिल्लो वर्षमा ४१.४२ रुपैयाँ रहेको लघुवित्तको प्रतिसेयर आम्दानी गत वर्ष १८.८१ रुपैयाँ ऋणात्मक भएको छ छ ।
समीक्षा अवधिमा लघुवित्तको प्रतिसेयर नेटवर्थ १७९.०१ रुपैयाँ र खराब कर्जा झन्डै तेब्बरले बढेर ८.३६ प्रतिशत पुगेको छ ।
