काठमाडौं । पहिलो पटक नेपालबाट वेलायत नर्स पठाउने प्रक्रिया सुरु भएको छ । श्रम, रोजगार तथा सामाजिक सुरक्षा मन्त्रालयले नेपाली नर्सलाई रोजगारीका लागि वेलायत पठाउन आवेदन खुलाएको हो ।
नेपालबाट पहिलो चरणमा पाइलट प्रोजेक्टका रूपमा १०० जना स्टाफ नर्स लैजाने गरी आवेदन खुलाइएको हो । सरकार–सरकार (जीटुजी) संयन्त्रमार्फत नर्सहरू वेलायत पठाउन लागिएको हो ।
जीटुजी प्रक्रियामार्फ वेलायत नर्स लैजान यसअघि नै दुई देशबीच सम्झौता भइसकेको छ । बेलायत जान इच्छुक नर्सले शुक्रबारदेखि कात्तिक २ गतेसम्म https://ferms.dofe.gov.np मार्फत अनलाइन आवेदन दिन सक्नेछन्।
वेलायत जानका लागि आवेदन दिन स्टाफ नर्स, नर्सिङमा स्नातक (बीएससी वा बीएन), वा नेपाल सरकार वा विदेशको मान्यता प्राप्त संस्थाबाट नर्सिङमा स्नातकोत्तर गरेको हुनुपर्नेछ । त्यस्तै, नेपाल नर्सिङ काउन्सिलबाटव्यावसायिक इजाजतपत्र लिएको, कम्तीमा २ वर्ष काम गरेको अनुभव भएको हुनुपर्नेछ भने आइइएलटीएसमा पनि ७ स्कोर ल्याएको हुनुपर्ने छ ।
नेपालबाट छनौट भइसकेपछि बेलायत पुगेर त्यहाँको नर्सिङ काउन्सिलमा पनि परीक्षा दिनुपर्नेछ। त्यहाँको परीक्षामा उत्तीर्ण भएपछि मात्रै स्थायी रोजगारीको सुनिश्चतता हुनेछ।
