काठमाडौं । पछिल्लो समय स्वास्थ्य र शैक्षिक संस्थाहरूलाई कडाइका साथ नियमन गर्दै आएको काठमाडौं महानगरपालिकाले सहकारी संस्थाहरूलाई पनि कडाइ गर्ने भएको हो ।
महानगरपालिकाले बुधबार एक सूचना जारी गर्दै सहकारी संस्थाहरूलाई ३० दिन भित्र विवरण उपलब्ध गराउन निर्देशन दिएको हो ।
महानगरले अहिलेसम्म सहकारीहरूले साधारण सभाको जानकारी, लेखापरीक्षण प्रतिवेदन लगायत विवरण नबुझाएको भन्दै ३० दिन भित्र बुझाउन भनेकाे हो ।
महानगरपालिका सहकारी ऐनले सहकारी संस्थाको साधारण सभा प्रत्येक आर्थिक वर्ष सकिएको मितिले ६ महिना भित्र बोलाउनुपर्ने, आव सकिएको बढीमा ३ महिना भित्र लेखापरीक्षकबाट प्रत्येक आवको लेखापरीक्षण गराउनुपर्ने भएपनि त्यसो नगरिएको भन्दै महानगरले सबै सहकारीलाई यथाशीघ्र विवरण अद्यावधिक गर्न भनेको हो ।
महानगरले ३० दिन भित्र विवरण नबुझाए र कानुनी प्रावधानहरु उल्लंघन गरेमा त्यस्ता सहकारी संस्था विघटन वा दर्ता नै खारेज गर्ने चेतावनी समेत दिएको छ ।
