काठमाडौं ।स्ट्याण्डर्ड चार्टर्ड बैंकले असार महिनाका लागि निक्षेपको ब्याजदर घटाएको छ । अरु २० वटा वाणिज्य बैंकले निक्षेपको ब्याजदर स्थिर राखे पनि स्ट्याण्डर्ड चार्टर्डले भने घटाएको हो ।
नेपाल बैंकर्स संघले कार्टेलिङ गर्दै असार महिनामा निक्षेपको ब्याजदर नघटाउने निर्णय गरेको थियो । तर, स्ट्याण्डर्ड चार्टर्डले भने मुद्दती निक्षेपको ब्याजदर १ प्रतिशत घटाएको छ ।
असार महिनाका लागि स्ट्याण्डर्ड चार्टर्डले व्यक्तिगत मुद्दती निक्षेपको ब्याजदर ८.९९ प्रतिशत र संस्थागत मुद्दतीको ६.९९ प्रतिशत तोकेको छ । अरु २० वटा वाणिज्य बैंकले भने व्यक्तिगत मुद्दतीको ९.९९ प्रतिशत र संस्थागतको ७.९९ प्रतिशत जेठकै ब्याजदरलाई निरन्तरता दिएका छन् ।
चार्टर्डले साधरण बचतमा भने अन्य बैंककै जस्तो न्यूनतम ५.४ प्रतिशतदेखि अधिकतम ७ प्रतिशतसम्म ब्याज दिने भएको छ ।
यस्तै, जेठ मसान्तसम्म चार्टर्डको बेसरेट ९.३५ प्रतिशत रहेको छ । बैंकले सो बेसरेटमा न्यूनतम २ देखि अधिकतम ४.७५ प्रतिशतसम्म प्रिमियम जोडर कर्जा दिने जनाएको छ ।
