काठमाडौं । सरकारी स्वामित्वको राष्ट्रिय बीमा संस्थानले विशेष साधारण सभा डाकेको छ । कम्पनी संचालक समितिको जेठ २ गतेको बैठकले जेठ २२ गते वार्षिक साधरण सभा आह्वान गर्ने निर्णय गरेको हो ।
सभा कम्पनीको प्रधान कार्यालय, रामशाहपथ, काठमाडौंमा हुनेछ । कम्पनीले सभामा हकप्रद सेयर जारी गर्ने सम्बन्धी विशेष प्रस्ताव लैजाने भएको छ ।
नेपाल बीमा प्राधिकरणको २०७८ चैत ११ गतेको निर्देशन अनुसार संस्थापक सेयरधनीहरु (नेपाल सरकार, नेपाल राष्ट्र बैंक र नेपाल बैंक)लाई हकप्रद सेयरमार्फत पूँजी थप गर्ने सम्बन्धी विशेष प्रस्ताव सभामा लैजाने भएको छ ।
नेपाल बीमा प्राधिकरणले पछिल्लो पटक थप गरेको म्याद अनुसार आगामी असार मसान्तसम्म जीवन बीमा कम्पनीले ५ अर्ब र निर्जीवन बीमा कम्पनीले साढे २ अर्ब चुक्ता पूँजी पुर्याउनु पर्नेछ ।
हाल राष्ट्रिय बीमा संस्थानको चुक्ता पूँजी हाल १८ करोड १० लाख २० हजार रुपैयाँ छ । तोकिएको चुक्ता पूँँजी पुर्याउन कम्पनीले ४ अर्ब ८१ करोड ८९ लाख ८० हजार रकम पूँजी थप गर्नुपर्ने छ ।
