काठमाडौं । बैंक तथा वित्तीय संस्थाबाट ५ करोडसम्म ऋण लिएका ऋणीहरूले कर्जाको पुनर्तालिकीकरण/पुनर्संरचना गर्न पाउने भएका छन् ।
नेपाल राष्ट्र बैंकले चालु वर्षको मौद्रिक नीतिको तेस्रो समीक्षालाई कार्यान्वयन गर्न बुधबार निर्देशन गर्दै यस्तो व्यवस्था गरेको हो ।
राष्ट्र बैंकका अनुसार बैंक तथा वित्तीय संस्थाले होटल तथा रेष्टुरेन्ट, पशुपंक्षी पालन, निर्माण क्षेत्रसँग सम्बन्धित कर्जा र रु. ५ करोडसम्मको अन्य सबै क्षेत्रमा प्रवाह भएको कर्जालाई ऋणीको अनुरोधमा पुनर्तालिकीकरण/पुनर्संरचना गर्न पाउने छन् ।
ऋणीले उद्योग/व्यवसायको नगद प्रवाह तथा आम्दानीे विश्लेषण गरी आवश्यकता र औचित्यको आधारमा बुझाउनुपर्ने ब्याजको कम्तीमा १० प्रतिशत रकम बुझाएर ऋण पुनरतालिकीकरण/पुनरसंरचना गर्न सक्नेछन् ।
ऋणीले आगामी असार मसान्तभित्र कर्जाको पुनर्तालिकीकरण/पुनर्संरचना गरिसक्नु पर्नेछ ।
