काठमाडौं । निर्धन उत्थान लघुवित्त वित्तीय संस्थाको खुद नाफामा भारी गिरावट आएको छ । लघुवित्तले सोमबार सार्वजनिक गरेको चालु आर्थिक वर्षको तेस्रो त्रैमासको अपरिष्कृत वित्तीय विवरण अनुसार खुद नाफा ९४.५२ प्रतिशतले घटेको छ ।
लघुवित्तले चालु आवको चैत मसान्तसम्म ४ करोड ४० लाख रुपैयाँ खुद नाफा कमाएको छ । यो गत वर्षको सोही अवधिको तुलनामा ७५ करोड ८६ लाख रुपैयाँ कम हो । लघुवित्तले गत वर्षको तेस्रो त्रैमासमा ८० करोड २६ लाख खुद नाफा कमाएको थियो ।
खुद ब्याज आम्दानी, संचालन मुनाफा घट्नुका साथै इम्पेयरमेन्ट चार्ज उल्लेख्य रुपमा बढ्दा लघुवित्तको नाफामा भारी गिरावट आएको हो ।
समीक्षा अवधिमा लघुवित्तको खुद ब्याज आम्दानी १०.१९ प्रतिशत घटेर १ अर्ब ४० करोड रुपैयाँमा सीमित भएको छ । त्यस्तै, सञ्चालन मुनाफा ९४.३७ प्रतिशतले घटेर ६ करोड ४५ लाखमा सीमित भएको छ ।
हाल २ अर्ब ६१ करोड रुपैयाँ चुक्ता पूँजी रहेको लघुवित्तको रिटेन्ड अर्निङमा ९ करोड २२ लाख र जगेडा कोषमा १ अर्ब ८३ करोड रुपैयाँ संचित छ । यस अवधिमा लघुवित्तको वितरण योग्य नाफा ८ करोड २६ लाख रुपैयाँ छ ।
नाफामा गिरावट आएसँगै लघुवित्तको प्रतिसेयर आम्दानीमा ठूलो गिरावट आएको छ । समीक्षा अवधिमा लघुवित्तको प्रतिसेयर आम्दानी ४८.७६ रुपैयाँबाट घटेर २.२५ रुपैयाँमा झरेको छ ।
समीक्षा अवधिमा लघुवित्तको प्रतिसेयर नेटवर्थ १७३.७६ रुपैयाँ, मूल्य आम्दानी अनुपात २७७.७८ गुणा र खराब १२.०९ प्रतिशत छ ।
