काठमाडौं । सनराइज बैंकले गत वर्षको नाफाबाट सेयरधनीलाई वितरण गर्ने १५.८० प्रतिशत लाभांश प्रस्ताव पारित गरेको छ।
नक्साल ब्यांक्वेटमा आज (शुक्रबार) सम्पन्न १२ औं वार्षिक साधारण सभाले १० प्रतिशत बोनस र सोको कर प्रयोजनार्थ समेत गरि ५.८० प्रतिशत नगद लाभांश वितरण गर्ने प्रस्ताव अनुमोदन गरेको हो।
यसअनुसार बैंकले सेयरधनीलाई ८१ करोड ५२ लाख ५५ हजार ५८५ रुपैयाँ बराबरको बोनस र कर प्रयोजन सहित ४७ करोड २८ लाख ४८ हजार २३९ रुपैयाँ नगद लाभांश वितरण गर्नेछ।
त्यसैगरी साधारण सभाले अन्य कुनै उपयुक्त बैंक तथा वित्तीय संस्था एक आपसमा गाभ्ने/गाभिने सम्बन्धी सम्पूर्ण काम गर्न सञ्चालक समितिलाई पूर्ण रुपमा अख्तियारी प्रदान गरेको छ।
हाल बैंकको चुक्ता पूँजी ८ अर्ब १५ करोड २५ लाख रहेको छ। १० प्रतिशत बोनस वितरणपश्चात बैंकको चुक्ता पूँजी ८ अर्ब ९६ करोड ७८ लाख रुपैयाँ पुग्नेछ।
बैंकले देशभर १२२ शाखा, ३८ शाखारहित बैंकिङ्ग, ८ एक्सटेन्सन काउन्टर, १४३ एटीएम मार्फत ६ लाख बढी ग्राकहरुलाई बैंकिङ्ग सेवा प्रवाह गर्दै आइरहेको छ।
