काठमाडाैं । गरिमा विकास बैंकले गत आर्थिक वर्षको आम्दानीबाट सेयरधनीहरुलाई १७ प्रतिशत लाभांश वितरण गर्ने भएको छ ।
नेप्सेमा प्रकाशित सूचनाका अनुसार बैंकले १६.१५ बोनस सेयर र ०.८५ नगद लाभांश वितरण गर्ने भएको हो । १६.१५ प्रतिशत बोनस सेयर वितरण गर्दा बैंकको चुक्ता पूँजीमा ४५ करोड रुपैंयाँ भन्दा बढिको बढोत्तरी हुनेछ ।
बैंकको प्रस्ताव राष्ट्र बैंक र बैंकको आगामी साधारण सभाको स्वीकृति पश्चात् मात्र वितरण योग्य हुनेछ । गरिमाको हाल २ अर्ब ७८ करोड रुपैंयाँ चुक्ता पूँजी रहेको छ । बोनस सेयर पश्चात बैंकको चुक्ता पूँजी ३ अर्ब २३ करोड रुपैयाँ पुग्नेछ ।
सेयर बजारमा गरिमा बैंकको अन्तिम कारोबार मूल्य प्रति सेयर २ सय १९ रुपैयाँ रहेको छ । यसको मतलब बैंकको ‘डिभिडेन्ड इल्ड’ ७.७६ प्रतिशत रहेको छ ।
पोखरेली बैंकको रुपमा चर्चा पाएको यो विकास बैंकले विगतमा पनि आफ्ना सेयरधनीहरुलाई राम्रो लाभांश वितरण गर्दै आएको छ । बैंकले विगत ९ वर्षदेखि औसत २० प्रतिशत हाराहारीले लाभांश वितरण गर्दै आएको छ ।
