काठमाडौं । देशको प्रमुख प्रशासनिक केन्द्र सिंहदरवार परिसर भित्र संचालित केन्द्रीय क्यान्टिनमा म्याद सकिएको खानेकुरा विक्री हुने गरेको पाइएको छ ।
वाणिज्य, आपूर्ति तथा उपभोक्ता संरक्षण विभागले आइतबार गरेको अनुगमनका क्रममा उक्त क्यान्टिनमा खान योग्य अवधी सकिएका तथा लेबलै नभएका मसला र दुग्धजन्य पदार्थ, दुर्गन्धित मासु र तरकारी फेला पारेको हो ।
अनुगमन टोलीले ती सबै वस्तु नष्ट गरी क्यान्टिन संचालकलाई कारबाही समेत गरेको छ ।
विभागले कञ्चन चमेना गृह र यसका सञ्चालक उत्तम भट्टलाई उपभोक्ता हित विपरितको कसुर गरेको हुँदा ३ लाख रुपैयाँ जरिवाना समेत गरेको छ ।
