काठमाडौं । आर्थिक वर्ष २०७६/७७ को पहिलो दुई महिना (साउन र भदौ)मा विदेशबाट भित्रिने रेमिट्यान्समा गिरावट आएको छ ।
नेपाल राष्ट्र बैंकले सार्वजनिक गरेको पछिल्लो तथ्यांक अनुसार यी दुई महिनाको अवधिमा विप्रेषण आप्रवाह ०.३ प्रतिशतले कमी आएको छ ।
समीक्षा अवधिमा १ खर्ब ५३ अर्ब ७३ करोड रुपैयाँ विप्रेषण भित्रिएको छ ।अघिल्लो वर्षको यसै अवधिमा विप्रेषण आप्रवाह ३३.४ प्रतिशतले बढेको थियो ।
रेमिट्यान्स घटेपनि यस अवधिमा विदेश जानेको संख्यामा वृद्धि भएको छ । दुई महिनाको अवधिमा अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) का आधारमा वैदेशिक रोजगारीमा जाने नेपालीको संख्या ०.२ प्रतिशतले बढेको छ । अघिल्लो वर्षको सोही अवधिमा यस्तो संख्या ३९.० प्रतिशतले घटेको थियो ।
यस अवधिमा पुनः श्रम स्वीकृतिका आधारमा वैदेशिक रोजगारीमा जाने नेपालीको संख्या १०.३ प्रतिशतले बढेको छ ।
अघिल्लो वर्षको सोही अवधिमा यस्तो संख्या ९.८ प्रतिशतले घटेको थियो ।
