काठमाडौं । एनआइसी एशिया बैंकले गत आर्थिक वर्ष २०७८/७९ को मुनाफाबाट पनि सेयरधनीलाई लाभांश वितरण नगर्ने भएको छ । बैंक संचालक समितिको पुस ५ गते बसेको बैठकले गत वर्षको नाफाबाट लाभांश वितरण नगर्ने निर्णय गरेको हो।
बैंकले अघिल्लो आर्थिक वर्षको नाफाबाट पनि सेयरधनीलाई लाभांश दिएन । बैंकले आव २०७७/७८ को मुनाफाबाट १५.७९ प्रतिशत लाभांश घोषणा गरे पनि तोकिएको पूँजीकोष कायम नगरेको भन्दै नेपाल राष्ट्र बैंकले रोकेको थियो ।
बैंकले गत वर्षको नाफाबाट सेयरधनीलाई लाभांश नदिनुको कारण नबताए पनि राष्ट्र बैंकले तोकेको मापदण्ड पूरा नगर्दा यसपाली पनि लाभांश बाँड्न नमिल्ने भएको हो ।
एनआइसीले अघिल्लो वर्ष जस्तै गत वर्ष पनि राष्ट्र बैंकले तोकेको प्राथमिक पूँजीकोष अनुपात कायम गर्न सकेको थिएन । बैंकले लाभांश घोषणा गरे पनि राष्ट्र बैंकले अस्वीकृत गर्ने देखिएपछि लाभांश वितरण नगर्ने घोषणा गरेको हो ।
बैंक तथा वित्तीय संस्थाले आर्थिक वर्षको कुनै एक महिना पनि पूँजीकोष अनुपात कायम नगरे सो आवको मुनाफाबाट लगानीकर्तालाई लाभांश वितरण गर्न नपाउने व्यवस्था छ ।
राष्ट्र बैंकको व्यवस्था अनुसार प्राथमिक पूँजीकोष न्यूनतम ८.५० प्रतिशत हुनुपर्छ । तर, एनआइसी बैंकको गत वर्षको पहिलो त्रैमासमा ७.३० र दोस्रो त्रैमासमा पूँजीकोष ७.८० प्रतिशत मात्रै कायम थियो।
गत आर्थिक वर्ष २०७८/७९ को चौथो त्रैमासिक वित्तीय विवरण अनुसार एनआइसी एशियाको वितरण योग्य नाफा २ अर्ब २४ करोड ६४ लाख रुपैयाँ छ । त्यसबाट बैंकले साढे १९ प्रतिशत लाभांश दिन सक्ने क्षमता राख्दछ ।
साथै, अघिल्लो आर्थिक वर्ष २०७७/७८ को मुनाफाबाट घोषणा गरेर वितरण नगरेको लाभांश बैंकले रिटेन्ड अर्निङमा राखेको छ । सो पैसाबाट पनि उसले थप लाभांश बाँड्न सक्थ्यो । तर, बैंकले वित्तीय अनुशासन पालना नगर्दा सेयरधनीको हात लगातार दुई वर्ष रित्तो भएको छ ।
