काठमाडौं । नेपाल तथा भारतका प्रधानमन्त्रीले भदौ २४ गते संयुक्त रुपमा उद्घाटन गरेको नेपाल–भारत पेट्रोलियम पाइपलाइन (भारतको मोतिहारीदेखि नेपालको अमलेखगञ्जसम्म) सञ्चलनमा आएको एक महिना पूरा भएको छ । एक महिनाको अवधिमा सो पाइपलाइनबाट करिब सवा चार करोड लिटर बराबरको डिजेल आयात भएको छ।
असोज २७ गतेसम्म अमलेखगञ्ज पाइपलाइनबाट ४ करोड २७ लाख ८७ हजार लिटर डिजेल आयात भएको नेपाल आयल निगम लिमिटेडले जानकारी दिएको छ।
उक्त डिजेल भैरहवा, पोखरा, थानकोट, विराटनगर लगायतका डिपोमा माग गरे बमोजिमको डिजेल उपलब्ध गराउँदै आएको निगमले बताएको छ।
निगमका अनुसार पाइपलाइनबाट डिजेल ल्याउन थालेपछि इन्डियन आयल कर्पोरेशनको डिपो तथा बरौनी, बैतलापुर, मुगलसराई, गोडा लगायतका रिफाइनरीबाट डिजेल आयात गर्न बन्द गरिएको छ।
