काठमाडौं । सरकारले विभिन्न वस्तुमा लगाएको प्रतिबन्ध हटाएसँगै आयात बढेको छ । चालु आर्थिक वर्षको साउनको तुलनामा भदौैमा ११ अर्ब बढीको वस्तु आयात भएको छ ।
भन्सार विभागले आइतबार सार्वजनिक गरेको तथ्यांक अनुसार भदौमा १ खर्ब ४१ अर्ब बराबरको विदेशी वस्तु आयात भएको छ । यो साउनको तुलनामा ११ अर्ब बढी हो । साउनमा १ खर्ब ३१ अर्ब रुपैयाँको वस्तु आयात भएको थियो ।
सरकारले विभिन्न ६ वस्तुमा लगाएको प्रतिबन्ध हटाउँदा र अन्य समयमाभन्दा चाडपर्वका लागि धेरै सामान ल्याउँदा आयात बढेको हो । सरकारले वैशाखदेखि विभिन्न १० वस्तु आयात प्रतिबन्ध लगाएकोमा गत महिनादेखि ६ वस्तुको आयात खुलाएको थियो ।
गत वर्षको तुलनामा भने चालु आवको दुई महिनामा वस्तु आयात १३.०१ प्रतिशतले घटेको छ । चालु आवको दुई महिनामा २ खर्ब ७३ अर्ब ५९ करोडको वस्तु आयात भएको छ । यो गत वर्षको सोही अवधिको तुलनामा ४१ अर्बले कम हो । गत वर्ष भदौसम्म ३ खर्ब १४ अर्ब ५१ करोड रुपैयाँ बराबरको वस्तु आयात भएको थियो ।
चालु आवमा निर्यातमा पनि ठूलो गिरावट आएको छ । गत वर्षको तुलनामा चालु आवमा वस्तु निर्यात ३४.८८ प्रतिशतले घटेको छ ।
यस वर्षको दुई महिनामा कुल २८ अर्ब ६८ करोडको वस्तु निर्यात भएको छ । जबकी गत वर्ष सोही अवधिमा ४४ अर्ब ३ करोडको वस्तु निर्यात भएको थियो ।
व्यापार घाटा ९.४५ प्रतिशतले कम
गत वर्षको तुलनामा चालु आवको दुई महिनामा व्यापार घाटा ९.४५ प्रतिशतले घटेको छ । विभागका अनुसार भदौसम्म कुल व्यापार घाटा २ खर्ब ४४ अर्ब रुपैयाँ रहेको छ । जबकी गत वर्षको सोही अवधिमा २ खर्ब ७० अर्ब रुपैयाँ व्यापार घाटा थियो ।
आधा अर्बको पेट्रोलियम पद्धार्थ आयात
चालु आवको दुई महिनामा आधा अर्ब बढीको पेट्रोलियम पद्धार्थ आयात भएको छ । विभागका अनुसार चालु आवको दुई महिनामा ५० अर्ब ८८ करोड रुपैयाँ बराबरको पेट्रोलियम पदार्थको आयातमा भएको छ । यो आयातित वस्तुमध्ये सबैभन्दा धेरै हो ।
त्यस्तै, दुई महिनामा फलाम र स्टीलको आयातमा २४ अर्ब ३५ करोड रुपैयाँ विदेशिएको छ । त्यसैगरी, दुई महिनामा विद्युतीय सामग्री १८ अर्ब २३ करोड, औषधिजन्य वस्तु आयात १० अर्ब १७ करोड, वनस्पति तेल र यससँग सम्बन्धी वस्तु १९ अर्ब ८ करोड रुपैयाँ बराबरको आयात भएको छ ।
