काठमाडौं । चरम तरलता अभाव झेलिरहेका बैंकहरुलाई थोरै राहत मिलेको छ । साउनको अन्तिम दिन १३ अर्ब निक्षेप थपिएपछि केही राहत मिलेको हो ।
साउनको ३० दिनमा १ खर्ब २० अर्ब निक्षेप बाहिरिएकोमा साउन ३१ गते भने १३ अर्ब निक्षेप थपिएको नेपाल राष्ट्र बैंकले जनाएको छ । साउन ३० गतेसम्म ४४ खर्ब २१ अर्ब रुपैयाँ निक्षेप रहेकोमा ३१ गते बढेर ४४ खर्ब ३४ अर्ब रुपैयाँ पुगेको हो।
समग्रमा साउन महिनामा वाणिज्य बैंकहरुबाट १ खर्ब ७ अर्ब निक्षेप बाहिरिएको छ । निक्षेप बढेसँगै बैंकहरुको सीडी रेसियोमा पनि घटेको छ । साउन ३० गते ८८.२७ प्रतिशत पुगेको सीडी रेसियो साउन ३१ गते ८८.०७ प्रतिशतमा झरेको हो।
राजस्व संकलन हुने तर विकास खर्च नहुने तथा आयातित सामानको भुक्तानी बढ्दा निक्षेप घटेको हो । साउनमा सरकारले ९१ अर्ब राजस्व संकलन गर्दा जम्मा २२ अर्ब मात्र खर्च गरेको छ ।
साउन महिनामा कर्जा प्रवाह पनि ३ अर्ब घटेको छ । असार मसान्तसम्म ४१ खर्ब ७५ अर्ब रुपैयाँ कर्जा प्रवाह भएकोमा साउन मसान्तसम्म आउँदा ४१ खर्ब ७२ अर्बमा झरेको छ ।
