काठमाडौं । अन्तर्राष्ट्रिय बजारमा कच्चा तेलको मूलयमा निरन्तर गिरावट आएको छ । कच्चा तेलको मूल्य लगातार ओरालो लागेसँगै ५ महिना यताकै सस्तो भएको छ ।
विश्वव्यापी आर्थिक मन्दी आउने प्रक्षेपण र हल्लाका कारण अन्तर्राष्ट्रिय बजारमा कच्चा तेलको मूल्य ५ महिना यताकै सस्तो भएको छ । गत फेब्रुअरीमा रुस युक्रेन युद्ध सुरु भएसँगै आकाशिएको कच्चा तेलको भाउ पछिल्लो दुई महिना यता ओरालो लागेको हो ।
फेब्रुअरी अन्तिममा प्रतिब्यारेल १४० डलरसम्म पुगेको ब्रेन्ट कच्चा तेलको मूल्य बिहीबार (१२ः३० बजेसम्म) प्रतिब्यारेल ९९.३२ डलरमा झरेको छ । त्यस्तै डब्लूटीआई कच्चा तेलको भाउ प्रतिब्यारेल ९५.८७ डलरमा झरेको छ ।
यो पछिल्लो ५ महिना यताकै सस्तो हो । फेब्रुअरीपछि कच्चा तेलको मूल्य प्रति ब्यारेल १०० डलरभन्दा तल झरेको यो पहिलो पटक हो।
रुसले युक्रेनमा आक्रमण सुरु गरेसँगै अमेरिका र युरोपेली देशहरुले रसियन तेलमा प्रतिबन्ध लगाएसँगै विश्व बजारमा तेलको भाउ आकाशिएको थियो । तर, पछिल्लो समय युद्ध कायमै रहे पनि अन्य उत्पादक देशहरुले उत्पादन बढाउँदा मूल्यमा केही गिरावट आएको थियो ।
पछिल्लो एक महिना यता विभिन्न अध्ययनहरुले विश्वभर आर्थिक मन्दी आउने प्रक्षेपण गरेपछि तेलको खपतमा समेत केही गिरावट आएको छ । जसकारण कच्चा तेलको मूल्यमा गिरावट आउन थालेको छ ।
यदि विश्वव्यापी आर्थिक मन्दी आएमा यस वर्षको अन्त्यसम्म कच्चा तेलको भाउ प्रतिब्यारेल ६५ डलरसम्म आउने अमेरिकाको सिटी बैंकले चेतावनी दिएको छ ।
अन्तर्राष्ट्रिय बजारमा कच्चा तेलको भाउ घटेसँगै नेपाललाई पनि केही राहत मिल्ने देखिन्छ । नेपाल भारतबाट पेट्रोलियम पदार्थ खरिद गर्दै आएको छ । विश्व बजारमा तेलको भाउ घटेपछि भारतमा पनि घट्ने हुँदा नेपालमा पनि केही सस्तोमा आउने छ ।
