काठमाडौं । कमजोर सरकार भएको फाइदा उठाउँदै ब्यापारीले कमसल विद्युतीय कार नेपाल ल्याएर विक्री गर्दै आएका छन् । पछिल्ला दिनमा ब्राण्ड नेम नै नसुनेका करिब ६/७ वटा ब्राण्डले गाडी आयात सुरु गरेका छन् ।
यहाँ महत्वपूर्ण विषय विगत २ वर्षदेखि चीन आवत जावत बन्द भएपनि चिनियाँ कम्पनीले उत्पादन गरेका कमसल कारहरु नेपाल ल्याउने प्रवृति बढेको हो । यसरी आउने कारले नेपालको पैसा मात्रै लगेका छैनन् । हाम्रो जीवन नै जोखिममा पारिरहेका छन् ।
विद्युतीय कारमा एक प्रकारको माहोल तयार भएसँगै विभिन्न कम्पनी खडा गर्दै साना गाडी ल्याउने क्रम बढ्यो । मोटरसाइकलको सट्टा आफ्नै चारपाङ्ग्रे सवारी नारा दिएर विक्री सुरु भएका यस्ता गाडी हाम्रो सडक सुहाउदो पनि छैन भने सुरक्षाको गयारेन्टी दिन सक्ने अवस्था छैन ।
एकाध बाहेक गाडी ल्याउने कुनै पनि कम्पनीले नेपालमा सर्भिस सेन्टर समेत संचालनमा ल्याएका छन् । कतिपय मोडल बजारमा आउन समेत बन्द भएको छ ।
विगत ३ वर्षमा नेपाल आएका र ग्राहकलाई केही यूनिट विक्री गरेका डेरीको इभी ७ र इएम७, दिगोको इ८, दिगोले नै ल्याएको दाय कार, ईको भिजिनरीले ल्याएको सिटी स्पीरिट, इभी नेपालले ल्याएको जिएक्स ८ जस्ता गाडीले ग्राहकको आवश्यकता पुराभन्दा आफ्नो आम्दानी दरिलो बनाए । यसले राम्रा उत्पादन ल्याउने ब्राण्डलाई समेत चुनौति थप्ने देखिन्छ ।
माथि उल्लेख गरिएका मध्ये दिगो बाहेक अन्य कम्पनीसँग आधिकारीक सर्भिस सेन्टर छैन भने १० यूनिटभन्दा माथि गाडी कुनै पनि ब्राण्डले विक्री गर्न सकेका छैनन् । सस्तो ईभीको चक्करमा यी ब्राण्डले ग्राहक र राज्य दुबैलाई ठगिरहेका छन् ।
ठूला भनिने ब्राण्डको अवस्था पनि त्यस्तै बनाइएको छ । अउडी, ज्यागुअर, टेस्ला जस्ता ब्राण्डले नेपालमा गाडी ल्याएर केही यूनिट विक्री गरेका छन् । त्यसपछि ती गाडीलाई प्रदान गरिने सेवा सून्य छ । यदि भोलिका दिनमा थप गाडी ल्याएर विक्री गर्ने हो भने टेस्लाले सर्भिस विस्तार गर्ने देखिन्छ, अन्य ब्राण्डको कुनै अत्तोपत्तो छैन ।
यसरी बजारमा विक्री भएका साना वा ठूला गाडी किन्ने धेरै ग्राहकले आफु ठगिएको अनुभव गर्न थालिसकेका छन् ।
पैसा र वातावरण दुबै वर्वाद
यसरी अब्यवस्थित तरिकाले आएका साना ईभीले हाम्रो पैसा त गएको छ नै त्यसको प्रभाव वातावरणमा पनि पर्नेछ । साना ईभी आयातकर्ताले सर्भिस सुविधा उपलब्ध नगराउने भएको कारण विग्रिएपछि ग्राहकले धेरै दुःख पाउने छन् ।
यी साना गाडी सुरक्षाको हिसावले पनि निकै कमजोर रहेका छन् । यी गाडीमा प्रयोग भएका ब्याट्री, मोटर, ब्याट्री मेनेजमेन्नट सिस्टम लगायतका विषयमा कुनै परिक्षण भएका डकुमेन्ट भेटिदैन । साथै, यसमा प्रयोग भएका ब्याट्री रिप्लेस गर्नु पर्ने अवस्था आउने हो भने पुराना ब्याट्री ब्यवस्थापन कसरी हुन्छ भन्ने विषय निकै पेचिलो बन्दैछ । यसले गर्ने हाम्रो वातावरण प्रदुषण पेट्रोलियम पदार्थको तुलनामा भयानक रहने छ ।
अहिले चल्तीका ब्राण्डले रिप्लेसमा आउने ब्याट्री आफैँ लिन्छन् भने त्यसको ब्यवस्थापन पनि उनिहरुको आफ्नै जिम्मेवारी हुन्छ । किनभने उनिहरु आफैँ ब्याट्री फेर्ने काम गर्छन् । त्यसैले लोकल ब्राण्डका साना र आधिकारीक विक्रेता नभएका ठूला ब्राण्डले ल्याएर विक्री गरेको ईभी किन्नु ग्राहकलाई निकै ठूलो घाटाको ‘डिल’ हुने देखिन्छ ।
