काठमाडौं । सरकारले पेट्रोलियम पदार्थमा लगाएकाे कर कटाैती गरेकाे छ ।
शनिबार पत्रकार सम्मेलन गरेर उद्योग वाणिज्य तथा आपूर्तिमन्त्री दिलेन्द्रप्रसाद बडूले प्रतिलिटर डिजेलमा २९ रुपैयाँ र पेट्रोलमा २० रुपैयाँ कर कटौती गरेकाे बताएका हुन् ।
याेसँगै अब डिजेलकाे प्रतिलिटर १६३ र पेट्रोलकाे १७९ रुपैयाँ पर्ने भएकाे छ ।
मन्त्रालयले कर कटाैतीकाे घाेषणा गरेपछि नेपाल आयल निगमले आज राति १२ बजेदेखि लागू हुनेगरी पेट्रोलियम पदार्थको नयाँ मूल्य सार्वजनिक गर्ने भएकाे छ ।
पछिल्लो समय अन्तर्राष्ट्रिय बजारमा पेट्रोलियम पदार्थको मूल्य निरन्तर उकालाे लागिरहेकाे छ । जसका कारण महंगीले उपभोक्ताकाे ढाड सेकिएकाे भन्दै कर कटाैतीकाे माग सहित चाैतर्फि आवाज उठेकाे थियाे ।
भारत, अमेरिका लगायतका देशहरूले पनि पेट्रोलियम पदार्थको मूल्य बढेपछि कर घटाएका छन् ।
सरकारले विभिन्न ७ शिर्षक (भन्सार, भ्याट, पूर्वाधार कर, मर्मत शुल्क लगायत)मा कर लिने गरेकाे छ ।
सरकारले भारतसँग १३१.९१ रुपैयाँमा किन्ने पेट्रोलमा प्रतिलिटर ६५.६१ रुपैयाँ र १४६.५२ रुपैयाँमा किनेको डिजेलमा ४९.५३ रुपैयाँ कर लिँदै आएको छ ।
त्यसमा पनि ढुवानी भाडा, निगमको खर्च, डिलरको नाफा लिने गरेको छ ।
जसकारण डिजेल र पेट्रोलको मूल्य खरिदमूल्य भन्दा झन्डै दोब्बर पुगेको छ ।
निगमले अहिले १३१.९१ रुपैयाँमा किनेको पेट्रोल १९९ र १४६.५२ रुपैयाँमा किनेको डिजेल १९२ रुपैयाँमा बेच्दै आएको छ ।
यद्यपि, खरिद मूल्यभन्दा विक्री मूल्य बढी हुँदा पनि नेपाल आयल निगम ठूलो घाटामा रहेको छ ।
निगमलाई अहिले पेट्रोलमा १३.५८ रुपैयाँ र डिजेलमा १३.९५ रुपैयाँ घाटा छ ।
चालु आवमै निगमले ५० अर्ब बढी घाटा व्यहोरिसकेको छ ।
