काठमाडौं । वर्षायाम सुरु भएसँगै नेपालको विद्युत् व्यापार बढ्न थालेको छ । वर्षाले नेपालका नदीहरुमा पानीको बहाव बढेसँगै विद्युत् उत्पादन बढ्दा भारत निर्यात हुने विद्युत्को परिमाण समेत बढेको हो ।
गत सातादेखि ३९ मेगावाट विद्युत् निर्यात सुरु गरेको नेपाल विद्युत् प्राधिकरणले आइबातरदेखि कालीगण्डकी एबाट उत्पादित बिजुली समेत निर्यात गर्न थालेको छ ।
आइतबारको तथ्यांक अनुसार नेपालबाट दैनिक औसत ५ करोड रुपैयाँससम्मको बिजुली भारतमा निर्यात हुन थालेको छ । सोमबार नेपालले भारतमा ४२ लाख २७ हजार १०० युनिट निर्यात गर्दैछ । प्राधिकरणका अनुसार मंगलबार १७६ मेगावाटसम्म बिजुली निर्यात हुनेछ ।
कालीगण्डकी ए जलविद्युत् आयोजनाबाट दिनमा १३८.८३ मेगावाट, देवीघाट जलविद्युत् केन्द्रबाट १४.३१ मेगावाट, त्रिशुली जलविद्युत् आयोजनाबाट २३.४ मेगावाट बिजुली निर्यात हुनेछ ।
सोमबारका लागि भारतको प्रतिस्पर्धी ऊर्जा बजारमा नेपालको बिजुलीले प्रतियुनिट अधिकतम् १२ भारु (१९.२ रुपैयाँ)सम्म मूल्य पाएको छ । न्यूनतम् ४.७८ पैसामा पनि बिजुली निर्यात हुनेछ । औसतमा प्रतियुनिट १२.८४ नेपाली रुपैयाँमा निर्यात भइरहेको प्राधिकरणको भनाइ छ । नेपालबाट रातको समयमा खपत हुन नसकेको बिजुली भारत गइरहेको छ ।
