काठमाडौं । बजारमा तरलता सन्तुलन राख्न नेपाल राष्ट्र बैंकले १० अर्ब ३३ करोड रुपैयाँ बराबरको ट्रेजरी बिल बिक्री गर्ने भएको छ ।
राष्ट्र बैंकले आज (असोज ६ गते) बोलकबोल प्रक्रियाबाट तीन फरक फरक अवधीको ट्रेजरी बिल बिक्री गर्न लागेको हो । बैंकले ९१ दिन, १८२ दिन र ३६४ दिन अवधिको ट्रेजरी बिक्री गर्न लागेको हो।
बैंकले बिक्री गर्न लागेको उक्त ट्रेजरी बिलमध्ये ९१ दिन अवधिका लागि ४ अर्ब ३ करोड रुपैयाँ, १८२ दिनको लागि ४ अर्ब ३० करोड रुपैयाँ र ३६४ दिन अवधिको २ अर्ब रुपैयाँको रहेको छ ।
बोलकबोल मार्फत बिक्री गर्न लागेको उक्त ट्रेजरी बिलमा सोमबार मध्याह्न ३ बजेसम्म अनलाईन विडिङ्ग प्रणाली मार्फत बोलकबोल गर्न सकिने केन्द्रीय बैंकले जनाएको छ।
असोज ७ गते मंगलबार जारी हुने ट्रेजरी बिलको बोलकबोलमा बैंक तथा वित्तीय संस्था, संगठित संस्था तथा सर्वसाधारण नागरिक समेत सहभागी हुन सक्नेछन् ।
बोलकबोलमा सबैभन्दा बढी मूल्य उल्लेख गर्ने संस्थालाई पहिलो प्राथमिकतामा राखेर क्रमैसँग आह्वान रकमसम्म ट्रेजरी बिलको बाँडफाँड गरिने राष्ट्र बैंकले जनाएको छ।
