काठमाडौं । सरकारले आगामी आर्थिक वर्षमा रसायनिक मल खरिदका लागि १५ अर्ब रुपैयाँ बजेट विनियोजन गरेको छ ।
अर्थमन्त्री जनार्दन शर्माले आज संघीय संसदको संयुक्त बैठकमा पेश गरेको आर्थिक वर्ष २०७९/८० को बजेटमा उक्त रकम विनियोजन गरिएको हो ।
रसायनिक मलको आपूर्ति सुनिश्चित गर्ने बजेट ल्याइएको हो । देशभर कुल ५ लाख २० हजार मेट्रिकटन रसायनिक मल आवश्यक पर्छ । किसानले हरेक वर्ष मल आभावमै खेती गर्नुपर्ने बाध्यता रहेको छ । सरकारले अझै पनि मलको उपलब्धतालाई सहज बनाउन सकेको छैन ।
भन्सार विभागको तथ्यांक अनुसार चालु आवको चैत मसान्तसम्ममा १३ अर्ब २८ करोड ४२ लाख रुपैयाँ बराबरको मल आयात भएको छ । सो मूल्यमा १६ करोड ४२ लाख ९५ हजार ३९९ केजी मल आयात भएको तथ्यांकले देखाएको छ ।
