काठमाडौं । स्थानीय तहको निर्वाचन हुने दिन ३० वैशाखमा आन्तरिक तर्फका उडान नहुने भएको छ । निर्वाचनको दिन सबै सार्वजनिक यातायात बन्द हुने भएसँगै आन्तरिक हवाई सेवा पनि बन्द हुने भएको हो ।
यद्यपि, सो दिन अन्तर्राष्ट्रिय हवाई उडान भने नियमित हुनेछ । आन्तरिक हवाई सेवा प्रदायक कम्पनीहरुले सो दिन उडान नहुने जानकारी गराएका छन् ।
बुद्ध एयरले ट्राभल एलर्ट जारी गरी चुनावका दिन उडान नहुने जानकारी गराएको छ । यस्तै, यती एयरलाइन्सले पनि सो दिन उडान नहुने जनाएको छ । साथै, अन्य कम्पनीहरुले पनि उडान नगर्ने जनाएका छन् ।
निर्वाचन आयोगले यो दिन विदेश जाने यात्रुको सहजिकरणका लागि सवारी साधनलाई समेत चल्ने व्यवस्था मिलाउन सरकारलाई पत्राचार गरेको छ ।
सो दिन सार्वजनिक यातायात चलाउन नपाइने भए पनि निजी सवारीसाधन भने जिल्ला प्रशासन कार्यालयबाट पास लिएर चलाउन पाइने छ ।
