काठमाडौं । चालु आर्थिक वर्षको ९ महिना (साउन–चैत) मसान्तसम्म जीवन बीमा कम्पनीहरूले १ खर्ब २४ अर्ब २९ करोड रुपैयाँ बीमा शुल्क संकलन गरेका छन् । गत वर्षको सोही अवधिको तुलनामा कम्पनीहरूले ८ अर्ब ५६ करोड रुपैयाँले बीमा शुल्क संकलन बढाएका हुन् ।
समीक्षा अवधिमा कम्पनीको बीमा शुल्क आर्जन ९.१३ प्रतिशतले बढेको हो । गत आवको चैत मसान्तसम्म कम्पनीहरूले ९३ अर्ब ८६ करोड रुपैयाँ शुल्क आर्जन गरेका थिए ।
बीमा समितिले सार्वजनिक गरेको तथ्यांक अनुसार सबैभन्दा धेरै बीमा शुल्क संकलन गर्नेमा नेपाल लाइफ इन्स्योरेन्स शीर्ष स्थानमा रहेको छ भने महालक्ष्मी लाइफ इन्स्योरेन्स पुच्छरमा रहेको छ ।
करिब २ वर्ष कोरोना महामारीले व्यवसाय विस्तार गर्न नपाएका कम्पनीहरू आर्थिक गतिविधि चलाएमान भएसँगै आक्रामक बनेका हुन् । साथै, मानिसमा बीमाको पहुँच र चेतना बढ्दै गएको छ । जसको कारण कम्पनीहरूको बजार हिस्सा बढ्दै गएको छ ।
नेपाल लाइफको वर्चस्व कायमै
नेपाली जीवन बीमा कम्पनीमा सबैभन्दा धेरै बजार हिस्सा ओगटेको नेपाल लाइफ इन्स्योरेन्स कम्पनीले निरन्तर आफूलाई अग्रपंक्तिमा राख्दै आएको छ । चालु आवको ९ महिनामा यस कम्पनीले २६ अर्ब ३७ करोड रुपैयाँ बीमा शुल्क संकलन गरेको छ । समीक्षा अवधिमा कम्पनीले २५ अर्ब ३१ करोड रुपैयाँ बीमा शुल्क आजैन गरेको थियो ।
यस अवधिमा नेपाल लाइफले १ अर्ब रुपैयाँले मात्रै आफ्नो व्यवसाय बढाएको छ । दोस्रोमा नेपाल लाइफ इन्स्योरेन्स कर्पेरेसनले १२ अर्र्ब ४५ करोड रुपैयाँ बीमा शुल्क आर्जन गरेको छ ।
सबैभन्दा थोरै शुल्क संकलन महालक्ष्मी लाइफ इन्स्योरेन्स कम्पनीले १ अर्ब ८ करोड रुपैयाँ संकलन गरेको छ । चैत मसान्तसम्म राष्ट्रिय बीमा संस्थानले ६ अर्ब ९८ करोड, युनियन लाइफले ६ अर्ब १५ करोड, एसियन लाइफले ५ अर्ब १३ करोड, मेट लाइफ ४ अर्ब ३ करोड, सिटिजन ३ अर्ब ९० करोड, प्राइम ३ अर्ब ८९ करोड, सूर्य लाइफले ३ अर्ब ६३ करोड रुपैयाँ बीमाशुल्क आर्जन गरेका छन् ।
त्यसैगरी, सन नेपाल ३ अर्ब ३ करोड, रिलायबल नेपाल २ अर्ब ९९ करोड, ज्योती लाइफ २ अर्ब २ अर्ब ६३, आइएमई २ अर्ब ३८ करोड, गुँरास २ अर्ब ३३ करोड, रिलायन्स २ अर्ब ४ करोड, सानिमा १ अर्ब ७३ करोड, र प्रभु लाइफ इन्स्योरेन्स कम्पनीले १ अर्ब ४७ करोड रुपैयाँ बीमा शुल्क संकलन गरेका छन् ।
सन नेपाल आक्रामक, २ कम्पनीको खस्कियो
व्यवसाय विस्तारमा सन नेपाल लाइफ इन्स्योरेन्स कम्पनी आक्रामक बनेको छ । ९ महिनामा सबैभन्दा धेरै बीमा शुल्क संकलन बढाउने पहिलो कम्पनी बनेको हो । यस कम्पनीले समीक्षा अवधिमा ८०.८५ प्रतिशतले व्यवसाय विस्तार गरेको छ ।
गत वर्षको ९ महिनामा १ अर्ब ६८ करोड कुल बीमा शुल्क आर्जन गरेको यस कम्पनीले यस वर्षमो सोही अवधिमा ३ अर्ब ३ करोड रुपैयाँ शुल्क संकलन गरेको हो ।
दोस्रोमा महालक्ष्मीले करिब ६० प्रतिशतले व्यवसाय वृद्धि गरेको छ भने सिटिजनले ५३ प्रतिशत, प्रभु लाइफ इन्स्योरेन्सले ३० प्रतिशतले व्यवसाय विस्तारमा वृद्धि गरेको छ ।
यस अवधिमा दुई जीवन बीमा कम्पनीको व्यवसाय विस्तार भने खस्किएको छ । सबैभन्दा धेरै गुराँस लाइफ इन्स्योरेन्स कम्पनीको व्यवसायमा २३.५० प्र्रतिशतले गिरावट आएको छ भने लाइफ इन्स्योरेन्स कर्पोरेसनको ८.८१ प्रतिशतले व्यवसाय घटेको छ ।
