काठमाडौं । बीमा समितिमा २१ वटा बीमा कम्पनीहरूले पूँजी वृद्धिको योजना पेस गरेका छन् । संञ्चालनमा रहेका ३९ जीवन र निर्जीवन कम्पनीमध्ये आइतबार (१ बजेसम्म) आधा कम्पनीले मात्रै योजना पेस गरेका हुन् ।
बाँकी १७ वटा बीमा कम्पनीहरूलाई आजसम्म योजना पेस गर्न समितिले भनेको छ । समितिका अनुसार १० वटा जीवन र ११ वटा निर्जीवन बीमा कम्पनीहरूले पूँजी वृद्धिको योजना पेस गरेका हुन् ।
बीमा समितिका कार्यकारी निर्देशक राजुरमण पैडेलले अहिलेसम्म २१ वटा कम्पनीहरूले पूँजी वृद्धिको योजना बुझाएको र बाँकी कम्पनीहरूका लागि आजसम्म समय दिइएको बताए ।
‘तोकिएको अवधिमा पूँजी वृद्धिको योजना नबुझाउने बीमा कम्पनीहरूलाई समितिले नियमावली अनुसार कारबाही गर्छ,’ उनले भने, ‘अहिले २१ कम्पनीले मात्रै यस्तो योजना पेस गरेका छन । आजसम्मको समय छ । उनीहरूले दिएका योजनाहरूमा भोलिदेखि छलफल गर्छौं ।’
समितिका अनुसार जीवन बीमातर्फ सूर्य लाइफ, नेशनल लाइफ, एशियन लाइफ, महालक्ष्मी लाइफ, मेट लाइफ, एलआइसी नेपाल, सानिमा लाइफ, सिटिजन लाइफ, गुराँस लाइफ र रिलायन्स लाइफले पूँजी वृद्धि योजना पेश गरेका छन् ।
त्यसैगरी, निर्जीवनतर्फ सानिमा जनरल, आइएमई जनरल, एभरेष्ट, प्रुडेन्सियल, नेको, लुम्बिनी, शिखर, नेपाल इन्स्योरेन्स, सगरमाथा जनरल र अजोडले पूँजी वृद्धि योजना पेस गरेका छन् ।
समितिका अनुसार कम्पनीहरूले हकप्रद जारी गर्ने, बोनस सेयर दिने, मर्जर तथा आइपीओ निष्कासन गर्ने योजना पेस गरेका छन । गत चैत १० मा समितिले जीवन र निर्जिवन बीमा कम्पनीहरूको पूँजी साढे दुई गुणाले बढाउने समितिले निर्णय गरेको थियो ।
सोही निर्णय अनुसार बीमा कम्पनीहरूले १ महिना भित्र आफ्नो पुँजी योजना सम्बन्धित बोर्डबाट निर्णय गरेर पेस गर्न निर्देशन दिएको थियो । समितिले जीवन बीमा कम्पनीको लागि ५ अर्ब र निर्जीवन बीमा कम्पनीको चुक्ता पूजी २.५ अर्ब पूँजी तोकेको छ । यसअघि जीवन बीमा कम्पनीको चुक्ता पुँजी २ अर्ब रुपैयाँ र निर्जीवन बीमा कम्पनीको १ अर्ब रुपैयाँ रहेको थियो ।
समितिको उक्त निर्देशनसँगै अधिकांश बीमा कम्पनीहरू पूँजी वृद्धिको दबाबमा परेका छन् । जस अनुसार नेपाल लाईफ इन्स्योरेन्स बाहेकका जीवन र निर्जीवन बीमा कम्पनीहरू मर्जमा जाने वा अन्य विकल्प अपनाएर पूँजी बढाउने भन्ने द्धिविधामा छन् ।बीमा कम्पनीहरूले २०७९ को चैत मसान्त भित्र तोकिएको पूँजी कायम गरिसक्नुपर्ने छ ।
बीमा कम्पनीको संख्या घटाएर संस्थागत सुशासन र वित्तीय आधार बलियो बनाउनुका साथै बीमाको पहुँच बढाउन मर्जर तथा प्राप्तिलाई प्राथमिकता दिएर पूँजी वृद्धि गरिने समितिको दाबी छ ।
समितिले आफैले भने पूँजी वृद्धिको मोडालिटि बनाएको छैन् । बीमा कम्पनीको पूँजी वृद्धि सबैलार्य एउटे नभएर जोखीममा आधारीत व्यवसायको आधारमा हुनुपर्ने विज्ञहरू बताउँछन् ।
