काठमाडौं । सेयर बजारमा उछाल आएको हो । पछिल्लो दुई महिनायता लगातार घटिरहेको नेप्सेमा आज उछाल आएको हो ।
स्थानीय तहको निर्वाचनका लागि मनोनयन दर्ता सुरू भएसँगै देश चुनावी माहोलमा होमिएको छ । यसले लगानीकर्ता उत्साहित हुँदा नेप्सेले छलाङ मारेको आकलन गरिएको छ । चुनावको बेला सेयर बजारले पनि छलाङ मार्ने लगानीकर्ताहरुको मनोविज्ञान छ ।
साथै, लामो समयदेखि बजार घटिरहेकाले करेक्शन सकिएर नेप्सेले फेरि लय समात्न थालेकाले पनि बजारमा बढोत्तरी आएको लगानीकर्ताहरु बताउँछन् ।
सूचकसँगै आज कारोबार रकमा पनि बढोत्तरी आएको छ । गत साता औसतमा दैनिक डेढ अर्ब हाराहारीमा कारोबार हुँदै आएकोमा आज साढे २ अर्ब नाघेको छ ।
साताको पहिलो कारोबार दिन नेप्से ९५.४६ अंकले बढेर २४२०.९१ विन्दुमा पुगेको छ । यसदिन २३८ कम्पनीको २ अर्ब ५३ करोड १२ लाख ७५ हजार ५९३ रुपैयाँ बराबरको ६६ लाख ३९ हजार ५०४ कित्ता सेयर किनबेच भएको छ ।
आज कारोबारमा आएका १३ वटै समूहको परिसूचकमा हरियाली छाएको छ । फाइनान्स समूह सबैभन्दा धेरै ८.६ प्रतिशतले बढेको छ । त्यस्तै, हाइड्रोपावर समूह सबैभन्दा धेरै ७.३२ र विकास बैंक समूह साढे ६ प्रतिशतले बढेको छ ।
आज करोबारमा आएको २३८ कम्पनीमध्ये २२१ कम्पनीको सेयर मूल्य बढेको छ भने जम्मा ४ कम्पनीको मूल्य घटेको छ । १३ कम्पनीको सेयर मूल्य स्थिर रहेको छ ।
आज सानिमा बैंक प्रमोटर सेयरको सर्वाधिक कारोबार भएको छ । यसको २२ करोड रुपैयाँ बढीकोे सेयर किनबेच भएको छ । त्यसैगरी, शिवम् सिमेन्ट पौने १२ करोड र अरुण भ्याली हाइड्रोपावर ९ करोड बढीको कारोबार हुँदै शीर्ष तीनमा रहे ।
उच्च अंकले बढेको बजारमा दुई दर्जन बढी कम्पनीको सेयर मूल्यमा पोजेटिभ सर्किट लागेको छ । नेशनल हाइड्रो, बेस्ट फाइनान्स, श्री इन्भेष्टमेन्ट, जानकी फाइनान्स, मञ्जुश्री फाइनान्स, अरुण भ्याली, खानीखोला, घलेम्दी, युनिभर्सल पावर र हिमाल दोलखा हाइड्रोपावरको सेयर मूल्य ठ्याक्कै १० प्रतिशतले बढेको छ ।
त्यसैगरी, जाल्पा लघुवित्त, ग्रीन भेन्चर्स, पोखरा फाइनान्स, आँखुखोला, न्यादी, बरुण, सिंगटी, युनाइटेड मोदी, पञ्चकन्या माइ, दिव्यश्वरी, अपि पावर, अरुण काबेली हाइड्रोपावर, गुडविल फाइनान्स, गुराँस लघुवित्त र कर्पोरेट डेभलपमेन्ट बैंकका सेयरधनीले पनि करिब १० प्रतिशत कमाएका छन् ।
