काठमाडौं । गत शुक्रबारदेखि प्राथमिक साधरण सेयर (आइपीओ) विक्री खुला गरेको सीवाइसी नेपाल लघुवित्त वित्तीय संस्थाको खुद नाफा दोब्बरले बढेको छ ।
लघुवित्तले सोमबार सार्वजनिक गरेको चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण अनुसार लघुवित्तले ९ करोड ९९ लाख रुपैयाँ खुद नाफा कमाएको छ । यो गत आर्थिक वर्षको सोही अवधिको तुलनामा १०९.४१ प्रतिशत बढी हो। गत आर्थिक चैतसम्म लघुवित्तले ४ करोड ७७ लाख रुपैयाँ खुद नाफा कमाएको थियो।
खुद ब्याज आम्दानी, सञ्चालन मुनाफा बढ्दा र उल्लेख्य मात्रमा खराब कर्जा उठाउँदा लघुवित्तको खुद नाफा बढ्न पुगेको हो। समीक्षा अवधिमा लघुवित्तको खुद ब्याज आम्दानी ५५.३१ प्रतिशत बढेर १५ करोड ७७ लाख पुगेको छ भने सञ्चालन मुनाफा १०१.१७ प्रतिशत बढेर ८ करोड ७२ लाख रुपैयाँ पुगेको छ ।
समीक्षा अवधिमा लघुवित्तले १ अर्ब ४६ करोड सापटी र १ अर्ब २६ करोड निक्षेप संकलन गरी ३ अर्ब ३७ करोड कर्जा प्रवाह गरेको छ । हाल ८ करोड २१ लाख रुपैयाँ चुक्ता पूँजी रहेको लघुवित्तको जगेडा कोषमा ३० करोड ४ लाख रुपैयाँ सञ्चित छ।
खुद नाफासँगै लघुवित्तको प्रतिसेयर आम्दानी पनि बढेको छ। समीक्षा अवधिमा लघुवित्तको प्रतिसेयर आम्दानी ७१.३७ रुपैयाँ बढेर १६२.२५रुपैयाँ पुगेको छ । समीक्षा अवधिमा लघुवित्तको खराब कर्जा ४.६७ प्रतिशतबाट घटेर १.९७ प्रतिशतमा झरेको छ ।
