काठमाडौं । नेपालकै धनाढ्य व्यक्ति तथा व्यवसायी विनोद चौधरी विश्वको १९२९ औँ धनी व्यक्ति बनेका छन् । विश्व प्रसिद्ध पत्रिका फोर्ब्सले सार्वजनिक गरेको विश्वभरका डलर अर्बपतिहरुको सूचीमा चौधरी १९२८ औँ स्थानमा परेका हुन् ।
फोर्ब्सका अनुसार चौधरी दक्षिण एशियामा भारतबाहेक देशका एक्ला डलर अर्बपति समेत हुन् । दक्षिण एसियाका देशहरूमध्ये डलर अर्बपति रहेका देशमा भारत र नेपाल मात्र परेका हुन् ।
दक्षिण एसियाका अरू मुलुकहरू श्रीलंका, भुटान, पाकिस्तान, बंगलादेश, माल्दिभ्स र अफगानिस्तानका कुनै पनि व्यवसायी अर्बपतिको सूचीमा परेनन् ।
नेपालका एक मात्र डलर अर्बपति चौधरीको सम्पत्ति एक वर्षमा १० करोड डलर (करिब १२ अर्ब रुपैयाँ) बढेको छ । गत वर्ष १.४ अर्ब डलर रहेको उनको सम्पत्ति बढेर यो वर्ष १.५ अर्ब डलर पुगेको छ । चौधरी सन् २०१३ देखि अर्बपतिहरूको सूचीमा रहँदै आएका छन् ।
पछिल्लो समय राजनीतिमा सक्रिय रहेका चौधरी नेपाली कांग्रेसका केन्द्रीय सदस्य एवं प्रतिनिधिसभा सदस्य समेत रहेका छन् ।
अमेरिका सबैभन्दा धेरै अर्बपति
फोर्क्सका अनुसार अमेरिका विश्वका सबैभन्दा धेरै धनाढ्यको देश बनेको छ । अमेरिकामा संसारमै सबैभन्दा धेरै ७३५ जना अर्बपति रहेका छन् ।
त्यसैगरी, चीन दोस्रो धेरै अर्बपति हुने देश बनेको छ । चीनमा ५३९ अर्बपति रहेको फेर्ब्सले जनाएको छ । दक्षिण एशियाली मुलुक भारत विश्वका धेरै अर्बपति रहेको मुलुकमध्ये तेस्रो भएको छ । भारतमा १६६ अर्बपति रहेका छन् । भारतका गौतम अडानी र मुकेश अम्बानी क्रमशः विश्वका नवौं र दशौं धनीको सूचीमा छन् ।
२९०.३ अर्ब डलर सम्पत्ति रहेका एलन मस्क यस वर्ष पनि विश्वको सर्वाधिक धनी व्यक्ति भएका छन् । यस्तै दोस्रो धनी जेफ बेजोसको सम्पत्ति १८९.८ रहेको छ भने बर्नाड र बिल गेट्स क्रमशः तेस्रो र चौथो धनी रहेका छन् ।
