काठमाडौं । चन्द्रागिरि पछिल्लो समय काठमाडौंको लोकप्रिय ‘टुरिजम डेस्टिनेशन’ बनेको छ । केही वर्ष अघि पर्यटकीय गन्तव्यको रूपमा विकसित भएको चन्द्रागिरि अहिले काठमाडौं उपत्यका वरिपरीका गन्तव्यमध्ये सबैभन्दा पहिलो रोजाइमा पर्ने गरेको छ ।
हिउँ परे चन्द्रागिरि । केबलकार चढ्न, जिपलाइन चढ्न चन्द्रागिरि, हाइकिङ जान चन्द्रागिरि । धर्मकर्म गर्न चन्द्रागिरि । बालबच्चा घुमाउनदेखि ‘रिफ्रेस’ हुन चन्द्रागिरि ।
पछिल्लो समय बच्चादेखि बुढाबुढीसम्म सबैको रोजाइको पर्यटकीय गन्तव्य बनेको छ चन्द्रागिरि । काठमाडौं उपत्यकामा बस्नेदेखि छिमेकी जिल्लाहरूका मानिसदेखि विदेशी पर्यटक समेत यहाँ घुम्न आउने गरेका छन् ।
समुद्री सतहदेखि २ हजार ५५१ मिटर उचाइमा रहेको चन्द्रागिरि डाँडाबाट रमणीय हिम श्रृंखला, हरियाली जंगल र काठमाडौं उपत्यकाका साथै मकवानपुरको दृश्यावलोकन गर्न पाइन्छ । चन्द्रागिरिबाट २ दर्जनबढी हिमश्रृंखला देख्न सकिन्छ ।
एक दशक अघिसम्म हाइकिङ जाने बाहेक साखै रोजाइमा नपर्ने चन्द्रगिरि अहिले सबैको रोजाइमा पर्ने पर्यटकीय गन्तव्य बनेको छ ।चन्द्रागिरिलाई रोजाइको गन्तव्य बनाउने काम गरेको हो चन्द्रागिरि हिल्स प्रालिले ।
चन्द्रागिरि हिल्सले चन्द्रागिरि डाँडामा बनाएको पर्यटकीय पूर्वाधार र त्यहाँसम्म पुग्ने केबलकारले यस ठाउँमा सबैको ध्यान तानेको हो । केबलकार चढ्न गोरखाको मनकामना नै पुग्नुपर्ने बाध्यता हटाउँदै कम्पनीले २०७३ देखि केबलकार संचालनमा ल्याएसँगै यहाँ जाने आन्तरिक पर्यटक बढेका हुन् ।
काठमाडौंको अधिकांश ठाउँबाट सहजै सार्वजनिक यातायात लाग्ने र थानकोटबाट सरर केबलकार चढेर चन्द्रागिरि डाँडामा पुग्न सकिन्छ । केबलकारको बटम स्टेशन थानकोटदेखि टप स्टेशन चन्द्रागिरि डाँडामा करिब १० मिनेटमा पुगिन्छ ।
नयाँ प्रोडक्ट ‘कपल स्वीङ’
चन्द्रागिरि हिल्सले हाल चन्द्रागिरिमा केबलकार, रिसोर्ट, फनपार्क, भ्यू टावर, जीपलाइन, भालेश्वर मन्दिर लगायत पूवार्धार बनाइ संचालन गरिरहेको छ । केबलकारबाट व्यवसाय सुरु गरेको कम्पनीले अहिले उक्त गन्तव्यलाई एडभेञ्चर टुरिजम प्रोडक्ट थप्दै लगेको छ ।
कोरोनाकालमै जीपलाइन संचालनमा ल्याएको कम्पनीले हालै कपल स्वीङ संचालनमा ल्याएको छ । कम्पनीले महाशिव रात्रिदेखि कपल स्वीङ संचालनमा ल्याएको चन्द्रागिरि हिल्सका अप्रेशन म्यानेजर दुर्गा थापाले जानकारी दिए ।
नेपालका धेरै ठाउँमा सिंगल स्वीङ संचालनमा रहे पनि चन्द्रागिरिले सम्भवत पहिलोपटक कपल स्वीङ संचालनमा ल्याएको थापाको दाबी छ । थापाका अनुसार उक्त स्वीङ १८ वर्षभन्दा माथिकाले मात्र खेल्न पाउँछन् ।
४० फिट अग्लो कपल स्वीङमा एकपटमा दुई जनाले खेल्न सक्छन् । उक्त स्वीङ खेल्नका लागि एक जनाको ४०० रुपैयाँ र जोडीको ८०० रुपैयाँ शुल्क तोकिएको कम्प्नीले जनाएको छ । ग्राहकमा मुटुरोग, हाडजोर्नी, प्रेसर लगायत स्वास्थ्य समस्या छ/छैन भन्ने सोधेर मात्रै टिकट दिइने थापाले बताए ।
स्वीङमा बस्नु अघि कम्पनीका कर्मचरीले सेफ्टी बेल्ट र हेल्मेट लगाइ दिन्छन् । स्वीङलाई ३५ मिटरसम्म माथि लगेर छाडिने रहेछ । खेल्ने मान्छेको इच्छा अनुसार कति माथि पुर्याउने भनेर सोधेर सोही अनुसार छोडिन्छ ।
ग्राहकले ३ मिनेटदेखि ४ मिनेटसम्म स्वीङ गर्न पाउँछन् । स्वीङ गर्ने मान्छेले ‘डर लाग्यो’ भन्यो भने १/२ पटकमै पनि रोकिदिने गरेको थापा बताउँछन् ।
गोप्रोबाटा भिडियो खिच्ने व्यवस्था गरिने
उनले कपल स्वीङको डेकोरेशनको केही काम अझै नसकिएको बताए । उनका अनुसार यसलाई अझै आकर्षक बनाउन गोप्रोबाटा भिडियो पनि खिच्न सकिन्छ भनेर अध्ययन भइरहेको छ ।
स्वीङमा माथिबाट तल छोड्दा अलिकति झट्का दिने भएकाले आतिएर क्यामेरा छोड्न सक्ने सम्भावना भएकाले अध्ययन भइरहेको उनले बताए ।
एडभेन्चरको डेस्टिनेशन बनाउने योजना
उनले एडभेन्चरका लागि मानिसहरू ठाउँ खोज्दै भौँतारिने भएकाले उपत्यकामै एडभेन्चरको राम्रो डेस्टिनेशको रूपमा चन्द्रागिरि हिल्सलाई अघि बढाउने योजना रहेको बताए ।
सोही, क्रममा एडभेन्चरका जिपलाइन, रक क्लाइम्बिङ, कपल स्वीङ जस्ता प्रोडक्ट क्रमशः थपिँदै लगिएको उनले बताए । चाँडै नै अन्य नयाँ एडभेन्चर थप्दै लैजाने गरी योजना बनिरहेको थापाले बताए । कस्ता नयाँ एडभेन्चर प्रोडक्ट थपिने भने बारे उनले खुलाएनन् ।
१४९९ रुपैयाँमा कम्बो प्याकेज
चन्द्रागिरि हिल्सले आन्तरिक पर्यटकलाई लक्षित गर्दै कम्बो प्याकेज समेत ल्याएको छ । यस प्याकेज अनुसार १ हजार ४९९ रुपैयाँमा केबलकारको दुईतर्फी टिकट, जिपलाइन र टप स्टेशनमा लञ्च (सेटअप मेनु) उपलब्ध गराइने थापाले बताए ।
यो प्याकेज नेपाली नागरिहहरूका लागि मात्र लागू हुने कम्पनीले जनाएको छ । कम्पनीले विभिन्न अवसरमा आकर्षक प्याकेज ल्याउँदै आएको छ ।
हाल चन्द्रगिरिमा दैनिक १ हजारदेखि १ हजार ५०० हाराहारीमा आन्तरिक तथा बाहिय पर्यटक आउने गरेको थापाले बताए । अन्य समयमाभन्दा शनिबार र विदाका दिन यहाँ मानिसको घुइँचो लाग्ने गर्छ ।
धार्मिक, ऐतिहासिक तथा प्राकृतिक रुपले भरिपूर्ण चन्द्रागिरि कोभिडपछि फेरि ब्यूँझिन थालेको हो । विशोषगरी शनिबार मानिसहरू भालेश्वर महादेवको दर्शन गर्न जाने गरेका छन् ।
चन्द्रागिरिबाट २ दर्जनबढी हिमश्रृंखला देख्न सकिन्छ । यहाँबाटसर्वोच्च शिखर सगरमाथा, गौरीशंखर, लाङटाङ, अन्नपूर्ण लगायतका हिमाल देख्न सकिन्छ । यस्तै सूर्योदय र सूर्यास्तको अवलोकनका लागि पनि चन्द्रागिरि निकै उपयुक्त गन्तव्य हो ।
-तस्वीर : सरोज तिमलसिना
