काठमाडौं । सेयर बजारमा उच्च अंकको गिरावट आएको छ । पछिल्लो ३ साता यता ओरालो लागेको नेप्से आज पनि सोही लयमा झरेको हो ।
सूचक जस्तै कारोबार रकम पनि घट्दो क्रममा रहेको छ । यससाता दैनिक साढे २ अर्ब हाराहारीमा कारोबार हुँदै आएकोमा आज घटेर सर्वा २ अर्बमा सीमित भएको छ ।
बुधबार सेयर बजार मापक सूचक नेप्से ३०.२९ अंकले घटेर २५१४.६५ विन्दुमा आइपुगेको छ । यसदिन २२९ कम्पनीको २ अर्ब ३५ करोड २३ लाख १७ हजार १४२ रुपैयाँ बराबरको ४९ लाख ५९ हजार ९१९ कित्ता सेयर किनबेच भएको छ ।
आज कारोबारमा आएका १३ वटै समूहको परिसूचक राताम्मे भएको छ । व्यापार समूह सबैभन्दा धेरै ३.०३ प्रतिशतले घटेको छ । त्यस्तै, विकास बैंक र फाइनान्स समूह २ प्रतिशतले घटेको छ ।
कारोबार भएका २२९ कम्पनीमध्ये जम्मा २९ कम्पनीको सेयर मूल्य बढेको छ भने १९४ कम्पनीको घटेको छ । ५ कम्पनीको मूल्य स्थिर रहेको छ ।
आज नेपाल टेलिकमको सर्वाधिक कारोबार भएको छ । यसको साढे १० करोड बढीको सेयर किनबेच भएको छ । यस्तै, एनआइसी एशिया बैंक १० करोड र अपीपावर साढे ९ करोड बढीको कारोबार हुँदै शीर्ष तीनमा रहे ।
दोहोरो अंकले घटेको बजारमा आज विशाल बजार कम्पनीको सेयर मूल्य सबैभन्दा धेरै ५.७८ प्रतिशत घटेको छ । त्यसैगरी सामुदायिक लघुवित्त ५.६०, बुद्धभूमि नेपाल ५.४१, नेपाल हाइड्रो ५.२०, माउन्टेन हाइड्रो, युनियन हाइड्रो, पोखरा फाइनान्स र मितेरी डेभलपमेन्ट बैंकको सेयर मूल्य साढे ४ प्रतिशत घटेको छ ।
त्यस्तै, युनिभर्सल पावर, पञ्चकन्या माइ हाइड्रोपावर, नेशनल लाइफ, हिमालयन ऊर्जा, सिंगटी र जोशी हाइड्रोपावरका सेयरधनीले ४ प्रतिशत गुमाएका छन् । घट्दो बजारमा आज माउन्टेन इनर्जीका सेयरधनीले भने सबैभन्दा धेरै ८ं१० प्रतिशत कमाएका छन् ।
