काठमाडौं । नेपाल आयल निगम लिमिटेडले फेरिपेट्रोलियम पदार्थको मूल्यवृद्धि गरेको छ । दुई साता अघि भाउ बढाएको निगमले इन्डियन आयल कर्पोरेशनले इन्धनको मूल बढाएर पठाएसँगै फेरि बढाएको हो ।
निगमले शनिबार रातिदेखि लागू हुने गरी पेट्रोल, डिजेल र मट्टितेलमा प्रतिलिटर ३/३ रुपैयाँ भाउ बढाएको हो । नयाँ मूल्यअनुसार पेट्रोलको मूल्य १४५ रुपैयाँ पुगेको छ भने डिजेल र मट्टितेलको मूल्य १२८ रुपैयाँ कायम गरिएको छ । खाना पकाउने एलपी ग्यासको मूल्य भने यथावत राखिएको छ ।
अन्तर्राष्ट्रिय बजार मूल्य अनुरूप प्रतिलिटर पेट्रोल ५.६१ रुपैयाँले बढेको, डिजेल ५.६२ रुपैयाँले बढेको र हवाई इन्धन ४.९५ रुपैयाँले बढेर आएको निगमले जनाएको छ ।
सोही अनुरुप निगमलाई १५ दिनमा करिब २ अर्ब ४० करोड घाटा हुने अवस्था रहेका कारण मूल्य बढाउन बाध्य भएको निगमले विज्ञप्तिमार्फत जनाएको छ ।
