काठमाडौं । मंसिरमा वाणिज्य बैंकहरुको खुद नाफा १६ प्रतिशतले बढेको छ । तरलता अभावका बाबजूद वाणिज्य बैंकहरुले गत वर्षको सोही अवधिको तुलनामा खुद नाफा १६.२४ प्रतिशतले वृद्धि गर्न सफल भएका हुन् ।
नेपाल राष्ट्र बैंकको तथ्यांक अनुसार चालु वर्षको ५ महिना (मंसर मसान्तसम्म) २७ वाणिज्य बैंकहरुले २८ अर्ब २० करोड रुपैयाँ खुद नाफा कमाएका छन् । यो गत वर्ष सोही अवधिको तुलनामा ३ अर्ब ९४ करोड बढी हो । गत वर्ष मंसिरसम्म बैंकहरुले २४ अर्ब २६ करोड रुपैयाँ कमाएका थिए ।
चालु वर्ष कात्तिकको तुलनामा भने बैंकहरुले नाफा २० प्रतिशतले बढाएका छन् । कात्तिकसम्म २३ अर्ब ५२ करोड नाफा कमाएका बैंकहरुले मंसिरसम्म २८ अर्ब २० करोड रुपैयाँ नाफा कमाएका हुन् । मंसिर महिनामा मात्रै बैंकहरुले ४ अर्ब ६७ करोड रुपैयाँ नाफा कमाएका छन् ।
चालु आवको ५ महिनामा वाणिज्य बैंकहरुले औसतमा १ अर्ब ४ करोड नाफा कमाएका छन् । यो गत वर्षको सोही अवधिको तुलनामा १५ करोडले बढी हो । गत वर्ष मंसिरसम्म औसतमा ८९ करोड रुपैयाँ नाफा कमाएका थिए ।
समीक्षा अवधिमा एनआइसी एशियाले सबैभन्दा धेरै २ अर्ब र सेञ्चुरी कमर्शियलले सबैभ्न्दा कम ४० करोड नाफा कमाएको छ ।
नबिललाई पछि पार्दै एनआइसी र ग्लोबल
चालु वर्षको ५ महिनाको तथ्यांक अनुसार खुद नाफामा नबिल बैंकलाई एनआइसी एशिया र ग्लोबल आइएमई बैंकले पछि पारेका छन् । वर्षौंदेखि खुद नाफामा शीर्ष स्थानमा रहँदै आएको नबिललाई मंसिरमा ग्लोबल र एनआइसीले पछि पारेका हुन् ।
पछिल्लो समय आक्रमक कर्जा विस्तार गर्दै आएको एनआइसीले नबिललाई चालु आवको पहिलो त्रैमासदेखि पछि पार्न थालेको हो । चुक्ता पूँजीको आधारमा सबैभन्दा ठूलो ग्लोबल आइएमईले आक्रमक कर्जा विस्तारसँगै नाफामा नबिललाई पछि पारेको हो ।
मंसिरसम्म २ अर्ब नाफा कमाउँदै एनआइसी एशिया सबैभन्दा धेरै नाफा कमाउने वाणिज्य बैंक बनेको छ । एनआइसीले सो अवधिमा नबिलकोभन्दा ११ करोड रुपैयाँ नाफा कमाएको हो । नबिलले यस अवधिमा १ अर्ब ८९ करोड नाफा कमाएको छ ।
त्यस्तै, ५ महिनाको अवधिमा ग्लोबल आइएमई बैंकले पनि नबिलकोभन्दा ७ करोड रुपैयाँ धेरै नाफा कमाएको छ । मंसिरसम्म ग्लोबलले १ अर्ब ९६ करोड नाफा कमाएको छ ।
११ बैंक अर्बपति क्लबमा
चालु आवको ५ महिनामा ११ ओटा बैंक अर्बपति क्लबमा प्रवेश गरेका छन् । समीक्षा अवधिमा ११ ओटा र्बैंकले १ अर्ब बढी नाफा कमाएका हुन् । यसअघि प्रथम त्रैमासिकमा ५ वटा बैंक अर्बपति क्लबमा प्रवेश गरेका थिए ।
मंसिरसम्म सबैभन्दा धेरै नाफा कमाउन सफल भएको एनआइसी एसीया बैंकले २ अर्ब ग्लोबल आइएमई बैंकले १ अर्ब ९६ करोड, नबिल १ अर्ब ८९ करोड, राष्ट्रिय वाणिज्य बैंक १ अर्ब ८८ करोड, प्राइम कमर्सियल बैंक १ अर्ब ५० करोड रुपैयाँ नाफा कमाएका छन् ।
यसैगरी,प्रभु बैंकको खुद नाफा १ अर्ब ३७ करोड, एनएमबी बैंकले १ अर्ब ३६ करोड, सिद्धार्थ बैंक र नेपाल इन्भेष्टमेन्ट बैंकले समान १ अर्ब ३३ करोड, मेगा बैंक १ अर्ब २६ करोड र नेपाल बैंकले १ अर्ब ३ करोड रुपैयाँ खुद नाफा कमाएका छन् ।
