काठमाडौँ । बीमा क्षेत्रको नियमनकारी निकाय बीमा समितिले आफैले दिएको निर्देशनको चौतर्फी आलोचनापछि अध्ययन समिति गठन गरेको छ । समितिले कार्यकारी निर्देशक राजजुरमण पौडेलको नेतृत्वमा ७ सदस्यीय अध्ययन समिति गठन गरेको हो ।
अध्ययन समितिमा पौडेलसहित निर्देशक शुशिलदेव सुवेदी, निर्जीवन बीमा कम्पनीहरुको तर्फबाट दुई जना, जीवन बीमा कम्पनीको तर्फबाट एक जना, दुई पुनर्बीमा कम्पनीहरुको तर्फबाट एक/एक जना प्रतिनिधि रहने छन् ।
अध्ययन समितिले स्वदेशमै शतप्रतिशत पुनर्बीमा गर्दा बीमा कम्पनीहरुलाई के कति असर पर्छ भन्ने अध्ययन गरी एक महिनाभित्र प्रतिवेदन बुझाउने समितिका अध्यक्ष पौडेलले बताए ।
यसअघि बीमा समितिले ९ मंसिरमा बीमा कम्पनीहरुलाई शतप्रतिशत स्वदेशमै पुर्नबीमा गर्नुपर्ने हतक्षेपकारी निर्देशन जारी गरेको थियो । समितिको उक्त निर्देशनको व्यापक आलोचना भएको थियो ।
केही समय अघि मात्रै संञ्चालनमा आएको हिमालयन रि इन्स्योरेन्सलाई बिजनेस दिन स्वार्थ समूहको चलखेलमा समितिले उक्त निर्देशन दिएको भन्दै सरोकारवालाहरुले विरोध जनाएका थिए ।
स्वदेशी पुर्नर बीमा कम्पनीहरुले मात्रै जोखीम बहन गर्न नसक्ने भन्दै बीमा कम्पनीहरुले समितिको उक्त निर्देशन फिर्ता लिन माग गदै समितिलाई ज्ञापनपत्र बुझाएका थिए ।
