काठमाडौं । नेपालले चालु आर्थिक वर्षको ४ महिनामा ८२ अर्ब १२ करोड १२ लाख रुपैयाँ भन्दा बढीको बस्तु निर्यात गरेको छ । नेपालले निर्यात गरेका अधिकांश बस्तु नेपालमा कच्चा पदार्थ उत्पादन नहुने रहेका छन् ।
नेपालले निर्यात गर्ने तेल लगायतका बस्तु ठूलो परिणाममा निर्यात गरेको देखिन्छ । त्यसको ठिक उल्टो नेपाल कृषि क्षेत्रसँग सम्बन्धीत खाद्य सामाग्री भने छिमेकी मुलुक चीन र भारतसँगै अन्य धेरै देशबाट ठूलो परिमाणमा आयात गरेको छ । धेरै वस्तुहरु आयात गर्ने नेपालले औंलामा गन्न सकिनेगरी केही वस्तुहरु मात्र निर्यात गर्दै आएको छ ।
नेपालमा थोरै परिणममा भएपनि छिमेकी मुलुक चीन र भारतसँगै विभिन्न वस्तुहरु जापान, नेदरल्याण्ड, स्पेन, जर्मनी, अष्ट्रेलीया, बेलायत, अमेरीका, स्वीजरल्याण्ड, पोल्याण्ड, पोर्चुगल लगायतका देशमा विभिन्न वस्तुहरु निर्यात गर्दै आएको छ ।
हरेक वर्ष अर्बौ रुपैयाँ बराबरको विभिन्न वस्तु आयात गर्दै आएको नेपालले थोरै भएपनि विभिन्न वस्तु निर्यात गर्नु पनि सकारात्मक रुपमा लिनु हाम्रो बाध्यता हो । तर, आयात अनुसार निर्यात धेरै नै कम भएकाले हरेक वर्ष नेपालको व्यापार घाटा बढ्दै गएको छ ।
भन्सार विभागका अनुसार निर्यात कम र आयात धेरै भएको कारण गतवर्षको तुलनामा चालु आवको पहिलो चार महिनामा ५ खर्ब ६८ अर्ब १७ करोड रुपैयाँ बराबरको व्यापार घाटा भएको छ ।
गत वर्षको सोही अवधिको तुलनामा व्यापार घाटा ५६.८३ प्रतिशतले बढेको हो । नेपालले गतवर्ष ३ खर्ब ६२ अर्ब २९ करोड बराबरको व्यापार घाटा बेहोरेको थियो ।
नेपालले निर्यात गरेको टप १० वस्तु
भन्सार विभागले दिएको जानकारी अनुसार चालु आर्थिक वर्षको पहिलो चार महिनामा २६ अर्ब ४० करोड ११ लाख १ हजार मूल्य बराबरको ११ करोड ७१ लाख ८३ हजार ६५७ किलो प्रशोधित भटमासको तेल भारत निर्यात गरेको छ । त्यसैगरी ११ अर्ब ५८ करोड ३७ लाख १९ हजार बराबरको प्रशोधित पाम तेल पनि भारतमा निर्यात गरेको छ ।
३ अर्ब ८९ करोड मूल्यको सेन्थेटिक र्यान, ३ अर्ब ३ करोड मूल्य बराबरको उनको फलैचा, २ अर्ब ६२ करोड बराबरको तयारी पोसाक, २ अर्ब ४७ करोड बारबरको जुट, २ अर्ब ३ करोड मूल्यको सुर्यमुखी तेल, १ अर्ब ९८ करोड मूल्यको जमोठ, १ अर्ब ८७ करोडको जुस, १ अर्ब ६० करोडको अलैची निर्यात भएको छ ।
सवा ७ खर्बको वैदेशिक व्यापार
भन्सार विभागका अनुसार चालु आर्थिक वर्षको पहिलो चार महिनामा नेपालले ७ खर्ब ३२ अर्ब ४१ करोड बराबरको वैदेशिक व्यापार गरेको छ । गतवर्ष सोही अवधिमा नेपालले ४ खर्ब ४२ अर्ब ६९ करोड बराबरको वैदेशिक व्यापार गरेको थियो । गत वर्षको सोही अवधिको तुलनामा चालु आवको चार महिनामा ६५.४५ प्रतिशतले वैदेशिक व्यापार बढेको छ ।
भन्सार विभागको समीक्षा अवधिमा ६ खर्ब ५० अर्ब २९ करोड ४३ लाख बढीको विदेशी वस्तुको आयात भएको छ भने, ८२ अर्ब १२ करोड १२ लाख बढीको स्वदेशी वस्तुको निर्यात भएको छ ।
