काठमाडौं । छिमेक लघुवित्त विकास बैंकको खुद नाफा झन्डै साढे तीन गुणाले वृद्धि भएको छ । लघुवित्तले सोमबार सार्वजनिक गरेको चालू आर्थिक वर्ष २०७८/७९ को पहिलो त्रैमासिक वित्तीय विवरण अनुसार खुद नाफा २३१.५४ प्रतिशतले वृद्धि भएको छ ।
चालू आवको असोज मसान्तसम्म लघुवित्तले २१ करोड ४१ लाख ६ हजार रुपैयाँ खुद नाफा कमाएको छ । यो गत आर्थिक वर्षको सोही अवधिको तुलनामा १४ करोड ९६ लाख रुपैयाँ बढी हो । गत आवको पहिलो त्रैमासमा लघुवित्तले ६ करोड ४५ लाख ८० हजार रुपैयाँ खुद नाफा आर्जन गरेको थियो।
लघुवित्तको खुद ब्याज आम्दानी, संचालन मुनाफा बढ्दा र खराब कर्जा घट्दा खुद नाफामा उल्लेख्य वृद्धि भएको हो ।
समीक्षा अवधिमा लघुवित्तको खुद ब्याज आम्दानी २३.५० प्रतिशतले बढेर ५३ करोड ३८ लाख रुपैयाँ पुगेको छ । यस्तै, समीक्षा अवधिमा लघुवित्तको संचालन मुनाफा उल्लेख्य रुपमा बढेको छ । गत वर्ष पहिलो त्रैमासमा ४ करोड ऋणात्मक रहेको लघुवित्तको संचालन मुनाफा चालू वर्षको सोही अवधिमा बढेर ३१ करोड रुपैयाँ पुगेको छ ।
समीक्षा अवधिसम्म लघुवित्तले २३ अर्ब ५७ करोड करोड निक्षेप संकलन र ५ अर्ब ५१ करोड सापटी लिइ कुल २६ अर्ब १६ करोड कर्जा प्रवाह गरेको छ । हाल १ अर्ब ८३ करोड चुक्ता पूँजी रहेको लघुवित्तको जगेडा कोषमा ३ अर्ब २८ करोड रुपैयाँ संचित रहेको छ ।
समीक्षा अवधिमा लघुवित्तको प्रतिसेयर आम्दानी साढे दुई गुणाले बढेर १७.२२ रुपैयाँबाट बढेर ४६.८० रुपैयाँ पुगेको छ । लघुवित्तको खराब कर्जा ४.२४ प्रतिशतबाट घटेर १.०३ प्रतिशतमा झरेको छ । समीक्षा अवधिमा लघुवित्तको प्रतिसेयर नेटवर्थ २७९.६२ रुपैयाँ, मूल्य आम्दानी अनुपात ३७.८२ प्रतिशत रहेको छ ।
